काठमाडौं- नेपाली कांग्रेसका नेता विजयकुमार गच्छदारले पार्टीमा देखिएको आन्तरिक विभाजन र अन्योल अन्त्यका लागि नेताहरूलाई लचिलो बन्न आग्रह गरेका छन् । शेरबहादुर देउवा पक्षद्वारा आयोजित एक कार्यक्रमलाई सम्बोधन गर्दै नेता गच्छदारले नेपाली कांग्रेसलाई विखण्डनबाट जोगाएर एकजुट बनाउन सबै पक्षबाट त्याग र लचकता आवश्यक रहेको बताए ।

कार्यक्रममा बोल्दै गच्छदारले कांग्रेसको एकताका लागि पूर्वसभापति देउवा पार्टीको पदीय र व्यक्तिगत जिम्मेवारीभन्दा माथि उठ्नुपर्ने धारणा राखे । त्यसैगरी गगन थापालाई लक्षित गर्दै उनले पार्टी केन्द्रीय कार्यालय सानेपामै मात्र सभापतिको कुर्सीमा सीमित नभई समग्र कांग्रेसको बृहत्तर हित र अवस्थालाई हेर्नुपर्ने टिप्पणी गरे ।

नेता गच्छदारले आफू पार्टीभित्रको वर्तमान अन्योलबाट निकै चिन्तित भएको बताउँदै अब कुनै अलमलमा नपरी स्पष्ट रूपमा पार्टी एकताको पक्षमा उभिने प्रतिबद्धता जनाए ।