काठमाडौं- नेपाली कांग्रेसकी नेतृ महालक्ष्मी उपाध्याय ‘डिना’ले पार्टीभित्रको आन्तरिक विवादका कारण देशको अवस्था नै विकराल बन्दै गएको बताएकी छन् । शेरबहादुर देउवा पक्षद्वारा आयोजित एक कार्यक्रमलाई सम्बोधन गर्दै उनले वर्तमान राष्ट्रिय परिप्रेक्ष्यमा मुलुकलाई जोगाउन नेपाली कांग्रेसको सुदृढ एकता नै मूल सिद्धान्त हुनुपर्नेमा जोड दिइन् ।

कार्यक्रममा बोल्दै नेतृ डिनाले पार्टीलाई आन्तरिक रूपमा एक ढिक्का बनाउनका लागि सबै नेता-कार्यकर्ता आफ्ना स्थापित मूल्य र मान्यतालाई अगाडि बढाउँदै अघि बढ्नुपर्ने बताइन् । देश र जनताले अहिले विभिन्न किसिमको अन्योल र आतंकको सामना गरिरहेको उल्लेख गर्दै उनले समग्र समस्याको निकास कांग्रेसको एकतामै निहित रहेको दाबी गरिन् । पार्टीलाई बलियो र एकीकृत बनाउनका लागि सबै पक्ष उत्तिकै जिम्मेवार र तयार हुनुपर्ने उनको भनाइ थियो ।

नेपाली कांग्रेस ऐतिहासिक मूल्य, मान्यता र सिद्धान्त बोकेको पार्टी भएको स्मरण गराउँदै उनले पछिल्लो समय पार्टीभित्रको छलफल र आवाज केवल नेताहरूलाई गाली गर्नेतर्फ मात्र केन्द्रित हुनु चिन्ताजनक रहेको बताइन् । एक-अर्कालाई निरन्तर दोषारोपण गरेर कांग्रेसलाई छिन्नभिन्न बनाउन नहुने आफ्नो स्पष्ट मान्यता रहेको उल्लेख गर्दै उनले आन्तरिक एकता कायम गरी मुलुकलाई सही दिशा दिन सबैलाई एकजुट हुन आग्रह गरिन् ।