काठमाडौं- नेपाली कांग्रेस भक्तपुरका सभापति दुर्लभ थापाले १५औँ महाधिवेशनमा शेरबहादुर देउवाको नेतृत्वमा आफूहरू अघि बढ्ने बताएका छन्।

संस्थापन इतर समूहले शुक्रबार काठमाडौंको सुकेधारास्थित मिराकल पार्टी प्यालेसमा आयोजना गरेको राष्ट्रिय भेलालाई सम्बोधन गर्दै थापाले देउवाको नेतृत्वमा १५औँ महाधिवेशन सफल बनाउने दाबी गरे।

उनले सानेपामा रहेको पार्टी कार्यालयका नेताहरूलाई लक्षित गर्दै १५औँ महाधिवेशनमा देउवाको नेतृत्वमा गएर आफ्नो शक्ति देखाउने बताए।

‘पार्टी कार्यालय सानेपाका नेताहरूलाई म भन्न चाहन्छु, १५औँ महाधिवेशनमा शेरबहादुर देउवाको नेतृत्वमा जाऔँ, तपाईंहरूको हालत के होला,’ थापाले भने।

थापाले भक्तपुरमा पार्टीको आधिकारिक नेतृत्व आफू नै रहेको दाबीसमेत गरे। ‘भक्तपुरमा कुनै अर्को सभापति छैन, कांग्रेसको सभापति म हो,’ उनले भने।

कांग्रेसभित्र सभापति गगन थापा पक्ष र पूर्वसभापति शेरबहादुर देउवा पक्षबीच नेतृत्व तथा पार्टीको आधिकारिकताका विषयमा विवाद चलिरहेका बेला दुर्लभ थापाको यस्तो अभिव्यक्ति आएको हो।