काठमाडौं- नेपाली कम्युनिस्ट पार्टीका नेता वर्षमानपुन र प्रधानमन्त्री वालेन्द्र शाहबीच शुक्रबार भेटवार्ता भएको छ।

उक्त भेटवार्तामा रोल्पामा १० जनाको ज्यान जाने गरी गएको पहिरो र त्यसका प्रभावितलाई क्षतिपूर्तिबारे दुईजनाबीच कुराकानी भएको छ।

भेटमा पहिरोपछि निम्तिएको विपद्बाट आएको समस्या समाधान गर्न सरकार सधैँ तयार रहेको बताउँदै प्रधानमन्त्रीले नेता पुनसँग प्रतिबद्धता जनाएका थिए।

उनले पहिरोबाट विस्थापित परिवारलाई पुनर्स्थापना, गाँसवास र कपासको व्यवस्था गर्नुपर्ने माग प्रधानमन्त्रीसँग राखेका छन् ।

पहिरो प्रभावितहरूको पुनःस्थापना र भविष्यमा पुनःनिर्माणको कामलाई पुग्दो सहयोग सरकारले गर्नुपर्ने पुनले बताए । उक्त पहिरोमा १० जनाको ज्यान जाँदा तीनजना अझै बेपत्ता छन्।

थबाङ गाउँपालिका-५ उवा कोटलबारामा बुधबार रातिको भीषण पहिरोमा १० जनाको मृत्यु भएको छ । पहिरोमा गम्भीर घाइते भएका दुईजनाको बुटवलमा उपचार भइरहेको छ।

प्रहरीका अनुसार पहिरोमा पुरिएका र बाढीले बगाएर लगेकासहित १० जनाको शव फेला परेको हो । घटनास्थलबाट ५ जनाको शव निकालिएको छ । थप ५ जनाको शव रोल्पाको लुंग्री खोला र प्यूठानको माडी नदी किनारमा परेको जिल्ला प्रहरी कार्यालय रोल्पाले जनाएको छ ।