काठमाडौं– नेपाली कांग्रेसको देउवा समूहले आयोजना गरेको राष्ट्रिय भेलामा सभापति शेरबहादुर देउवा र डा. शशांक कोइरालाको तस्बिर राखिएको छ।

आज आयोजित राष्ट्रिय भेलामा ७ हजारभन्दा बढी नेता, कार्यकर्ता तथा कांग्रेस शुभेच्छुक सहभागी हुने दाबी आयोजकले गरेको छ। 

भेलाको कार्यक्रम व्यवस्थापन तथा सञ्चालनको संयोजन शशांक कोइरालाले गरिरहेका छन्।

भेलास्थलमा राखिएको ब्यानरको एकातर्फ पूर्वसभापति शेरबहादुर देउवा र अर्कोतर्फ बीपी कोइरालाका पुत्र डा. शशांक कोइरालाको तस्बिर राखिएको छ।

यसअघि देउवा समूहका कार्यक्रमका ब्यानरमा प्रायः देउवाको मात्रै तस्बिर राखिने गरेकोमा यसपटक भेलाको संयोजन गरिरहेका शशाङ्कको तस्बिरसमेत राखिएको हो।

भेलामा डा. शशांक कोइरालासँगै डा. शेखर कोइराला पनि सहभागी छन्। करिब पाँच महिनापछि बिहीबार स्वदेश फर्किएका देउवा भेलाका प्रमुख अतिथि छन्। उनले भेलालाई सम्बोधन गर्ने कार्यक्रम रहेको आयोजकले जनाएको छ।

कांग्रेसको नयाँ नेतृत्वलाई लिएर पार्टीभित्र विवाद र शक्ति समीकरण चलिरहेका बेला देउवा समूहको भेलामा शशाङ्कको सक्रिय सहभागितालाई अर्थपूर्ण रूपमा हेरिएको छ।