काठमाडौं– नेपाली कांग्रेसका पूर्वसभापति शेरबहादुर देउवा पक्षले आयोजना गरेको राष्ट्रिय भेलामा नेतृ सुजता कोइराला सहभागी भएकी छैनन्।

कोइराला परिवारका नेताद्वय डा. शशांक कोइराला र डा. शेखर कोइराला देउवा पक्षको भेलामा सहभागी हुँदा सुजता भने उपस्थित भइनन्।

शुक्रबार कांग्रेसको बैठकमा धारणा राख्दै सुजाताले पार्टीको आगामी नेतृत्वमा सभापति गगन थापालाई साथ दिने बताएकी छन्। उनले अब नेपाली कांग्रेसको नेतृत्व थापाले नै गर्नुपर्ने धारणा राखेकी छन्।

सुजाताका अनुसार पार्टी सञ्चालनका लागि गगन थापाभन्दा उपयुक्त पात्र अहिले कांग्रेसमा नरहेको उनको निष्कर्ष छ।

कोइराला परिवारका तीन नेतामध्ये शशांक र शेखर देउवाको भेलामा सहभागी भइरहेका बेला सुजाताले गगनको पक्षमा उभिएपछि कांग्रेसभित्रको आन्तरिक शक्ति समीकरण थप रोचक बनेको छ।

देउवा पक्षले गगन थापालाई सभापतिको रूपमा स्वीकार नगरेको अवस्थामा सुजाताको पछिल्लो धारणा नयाँ नेतृत्वको पक्षमा खुलेर आएको महत्त्वपूर्ण राजनीतिक संकेतका रूपमा हेरिएको छ।