काठमाडौं– नेकपा (एमाले) का महासचिव शंकर पोखरेलले सञ्चार प्रतिष्ठानको प्रवेशमार्ग अवरुद्ध हुने गरी शंकास्पद ढंगले गाडी पार्किङ गरिएको घटनाप्रति कडा टिप्पणी गरेका छन्।

उनले यसलाई सञ्चार माध्यम र समाजलाई भयभित बनाउने सरकारको बचकना प्रयास भएको बताएका छन् ।

महासचिव पोखरेलले सामाजिक सञ्जालमार्फत् प्रतिक्रिया जनाउँदै सरकारका मान्छेको यो कदमलाई ‘विनाशकाले विपरीत बुद्धि’को संज्ञा दिएका छन्।

उनले सञ्चार प्रतिष्ठानको बाटो छेक्ने गरी गरिएको पार्किङले स्वतन्त्र सञ्चारमाथि मनोवैज्ञानिक दबाब सिर्जना गर्ने प्रयास भएको उल्लेख गरेका छन्।

पोखरेलले यस्तो गतिविधिले सञ्चार माध्यम र समाजलाई त्रसित बनाउने उद्देश्य बोकेको देखिएको बताएका छन्।

यस्ता बचकना हर्कतले लोकतान्त्रिक मूल्य, अभिव्यक्ति स्वतन्त्रता र स्वतन्त्र पत्रकारितालाई कमजोर बनाउन नसक्ने धारणा उनले राखेका छन्।