काठमाडौं- नयाँ दिल्लीमा भारत र सिङ्गापुरबीच आतंकवाद र अन्तरदेशीय अपराधविरुद्धको संयुक्त कार्यदलको पाँचौँ बैठक सम्पन्न भएको छ । यस बैठकमा दुवै देशले आतंकवाद र अन्तरदेशीय खतराहरूविरुद्ध द्विपक्षीय सहयोग बढाउने कुरामा जोड दिएका छन् ।

बैठकको सह-अध्यक्षता भारतको विदेश मन्त्रालयका संयुक्त सचिव डा. विनोद बहाडे र सिङ्गापुरको गृह मन्त्रालयका उपसचिव ङियाम शि चुनले गरेका थिए । संयुक्त विज्ञप्तिमा दुवै पक्षले सीमापार आतंकवादसहित सबै प्रकारका आतंकवादको कडा निन्दा गरेका छन् । उनीहरूले आतंकवादप्रति शून्य सहनशीलताको सिद्धान्तलाई पुनर्जीवित गरेका छन् ।

दुवै देशले सन् २०२५ अप्रिल २२ मा जम्मु कश्मीरको पहलगाममा र २०२५ नोभेम्बर १० मा नयाँ दिल्लीको लालकिल्ला नजिकै भएका आतंकवादी हमलाको निन्दा गरेका थिए । दुबै मुलुकले आतंकवादी हमलाका दोषीहरूलाई कानुनी दायरामा ल्याउनुपर्नेमा उनीहरूले जोड दिएका थिए ।

आतंकवादको सामना गर्न निरन्तर र व्यापक प्रयास आवश्यक पर्ने कार्यदलको निष्कर्ष छ । यसका लागि दुवै देशले संयुक्त राष्ट्र संघ, आसियान र एफएटीएफ जस्ता अन्तर्राष्ट्रिय मञ्चहरू मार्फत बहुपक्षीय सहयोग सुदृढ गर्ने प्रतिबद्धता जनाएका छन् ।