काठमाडौं- प्रमुख प्रतिपक्षी नेपाली कांग्रेससहितका दलहरू एकजुट भएर घेरेपछि सभामुख डोलप्रसाद अर्यालले प्रतिनिधि सभाको बैठक १५ मिनेटलाई स्थगित गरेका छन् ।

प्रधानमन्त्री वालेन्द्र शाह आगामी आर्थिक वर्षको नीति तथा कार्यक्रमसम्बन्धी प्रस्ताव टेबल गर्नसमेत नआएपछि प्रतिपक्षीले विरोध थालेका थिए ।

विपक्षी दलका नेता भीष्मराज आङ्देम्बेले १५-२० मिनेट संसद बैठक रोकेर संसदीय दलका नेता सचेतक र प्रमुख सचेतकसँग छलफल गर्न सुझाव दिएका थिए।

सभामुखले अर्यालले पेलेर अघि बढ्न खोज्दा प्रतिपक्षी आक्रोशित भए । प्रतिपक्षी नमानेपछि उनले बैठक रोकेर प्रमुख सचेतक, सचेतक, संसदीय दलका नेतासँग छलफल गर्ने भएका हुन् ।

प्रतिपक्षी दलले उभिएर निरन्तर विरोध र नाराबाजी गरेपछि संसद् १५ मिनेटलाई रोकिएको हो । विपक्षी दल श्रमसंस्कृति पार्टीले त संसद् बहिष्कार नै गरेको छ।