काठमाडौं- नेपाल आयल निगमले सामाजिक सञ्जालमा पेट्रोलियम पदार्थको मूल्यका विषयमा नकारात्मक र भ्रामक सूचनाहरू फैलिएको भन्दै गम्भीर ध्यानाकर्षण भएको जनाएको छ । अन्तर्राष्ट्रिय बजारमा मूल्य घटेको समयमा सोही अनुसार मूल्य समायोजन हुने जनाउँदै निगमले हालको जटिल परिस्थितिलाई बुझिदिन उपभोक्ता वर्गलाई आग्रह गरेको छ ।

निगमले पछिल्लो समय अन्तर्राष्ट्रिय बजारमा पेट्रोलियम पदार्थको मूल्य बढेसँगै निगमको वित्तीय अवस्था अत्यन्तै नाजुक बनेको जनाएको छ । निगमले जारी गरेको पछिल्लो प्रेस विज्ञप्ति अनुसार निगमलाई आगामी १५ दिनमा मात्रै करिब ७ अर्ब ८१ करोड ६१ लाख रुपैयाँ घाटा हुने प्रक्षेपण गरिएको छ ।

इन्डियन आयल कर्पोरेसनबाट मार्च ३१, २०२६ मा प्राप्त नयाँ मूल्य सूची अनुसार इन्धनको लागत मूल्य अत्यधिक बढेर आएको निगमले जनाएको छ । निगमका अनुसार हालको बिक्री मूल्यमा पेट्रोलमा प्रति लिटर ३२.३२ रुपैयाँ, डिजेलमा ८७.९९ रुपैयाँ र एलपी ग्यासमा प्रति सिलिन्डर ७६६.२५ रुपैयाँ घाटा रहेको छ ।

घाटा चुलिए तापनि निगमले आपूर्ति व्यवस्थापनलाई सहज बनाउन हरसम्भव प्रयास गरिरहेको दाबी गरेको छ ।