काठमाडौं – बागलुङको ढोरपाटन नगरपालिकामा थप दुईजनामा दादुरा संक्रमण पुष्टि भएको छ । स्वास्थ्य सेवा विभागका बाल स्वास्थ्य तथा खोप शाखा प्रमुख डा. अभियान गौतमले टेकुस्थित राष्ट्रिय जनस्वास्थ्य प्रयोगशालामा गरिएको परीक्षणमा थप दुईजनामा दादुरा संक्रमण पुष्टि भएको जानकारी दिए ।

यसअघि उक्त नगरपालिकाको वडा नंं ७, ८ र ९ का पाँचजना दादुरा संक्रमित पुष्टि भएको थियो । भारतबाट आएका एकजना दादुरा संक्रमितले ढोरपाटनमा दादुरा संक्रमण फैलाएका थिए । प्रमुख गौतमले दादुरा संक्रमित सबैको बुर्तिवाङ अस्पताल र बोबाङ स्वास्थ्यचौकीमा उपचार भइरहेको जानकारी दिए ।

दादुरा संक्रमण देखिएको ठाउँबाट फैलिन नदिनका लागि रोकथाम तथा नियन्त्रणको प्रयास गरिएको उनले बताए । हाल नगरपालिकामा ८३ शंकास्पद बिरामी छन् । २१ नमुना परीक्षणका लागि टेकुस्थित जनस्वास्थ्य प्रयोगशालामा पठाइएको छ । दादुरा संक्रमितको समुदायमा खोजी भइरहेको र उपचार तथा निगरानीसमेत भइरहेको जनाइएको छ ।

ढोरपाटनमा दादुराविरुद्धको विशेष खोप अभियान भोलि शनिबारदेखि चैत १ गतेसम्म सञ्चालन गरिने बताए । नगरपालिकाभित्रका विद्यालयमा अध्ययनरत कक्षा ६ माथिका तथा १० वर्षदेखि २० वर्ष उमेर समूहका करिब सात हजार जनालाई दादुराविरुद्धको खोप दिन लागिएको छ ।