काठमाडौं- राष्ट्रिय प्रजातन्त्र पार्टी (राप्रपा) बाट यस पटकको निर्वाचनमा एकमात्रै विजयी सांसद ज्ञानेन्द्र शाहीले आफ्नो चुनावी खर्च सार्वजनिक गरेका छन्।

राप्रपा प्रवक्ता तथा जुम्लाबाट निर्वाचित प्रतिनिधि सभाका सदस्य शाहीले फागुन २१ गते सम्पन्न निर्वाचनमा २० लाख ५५ हजार रुपैयाँ खर्च गरेको विवरण निर्वाचन कार्यालयमा पेश गरेका छन् ।

उक्त निर्वाचन अभियान सफलतापूर्वक सञ्चालन गर्न आर्थिक, भौतिक तथा नैतिक रूपमा सहयोग पुर्‍याउने सम्पूर्ण सहयोगीप्रति उनले धन्यवाद व्यक्त गरेका छन् ।

शुभेच्छुकहरूको विश्वास, साथ र हौसलाले आफूलाई अझै जिम्मेवार र सेवामुखी भएर काम गर्न प्रेरणा दिएको पनि उनले बताएका छन् ।

दोस्रो पटक जुम्लाबाट प्रतिनिधि सभामा निर्वाचित शाहीले आगामी दिनहरूमा जनताको माया, सुझाव र निरन्तर साथ पाउने आशा व्यक्त गर्दै सहयोग गर्ने सबैप्रति आभार व्यक्त गरेका छन् ।