काठमाडौं- लाल सागरमा तैनाथ अमेरिकी विमानवाहक युद्धपोत यूएसएस जेराल्ड आर फोर्डमा आगो लागेको छ । युद्धपोतको लुगा धुने ठाउँमा आगलागी हुँदा दुई जना सैनिक घाइते भएका छन् ।

अमेरिकी नौसेनाका अनुसार मार्च १२ मा भएको उक्त आगलागी बाह्य आक्रमणका कारण नभई प्राविधिक कारणले भएको हो । युद्धपोतमा लागेको आगोलाई तत्काल नियन्त्रणमा लिइएको र जहाजको मुख्य सञ्चालन प्रणाली वा इन्जिनमा कुनै क्षति नपुगेको समाचारमा जनाइएको छ । हाल युद्धपोत पूर्ण रूपमा सक्रिय रहेको नौसेनाले जनाएको छ ।

घाइते भएका दुई सैनिकहरूको स्थिर अवस्थामा उपचार भइरहेको छ । यो युद्धपोत गत जुन २४ देखि निरन्तर समुद्रमा सञ्चालनमा छ । पछिल्लो समय पश्चिम एशियामा बढ्दो तनावका बीच युद्धपोत सो क्षेत्रमा तैनाथ गरिएको छ ।

लामो समयदेखि समुद्रमा रहेका कारण यस जहाजले केही आन्तरिक समस्याहरू पनि खेपिरहेको छ । पछिल्लो समय जहाजको ढल निकास प्रणालीमा पटक-पटक समस्या आएका कारण त्यहाँ रहेका सयौँ शौचालयहरू प्रयोगमा कठिनाइ भएको समाचार आएको छ । सन् २०२५ मा मात्रै यस जहाजको मर्मत सम्भारका लागि ३२ पटकभन्दा बढी माग गरिएको बताइएको छ ।