काठमाडौं- इराकमा अमेरिकी सैन्य विमान खस्दा चार जनाको ज्यान गएको छ । पश्चिमी इराकमा अमेरिकी सेनाको केसी-१३५ इन्धन वाहक विमान खसेको हो ।

घटनामा चालक दलका चार सदस्यको मृत्यु भएको अमेरिकी सेनाको सेन्ट्रल कमाण्डले जानकारी दिएको छ । बिहीबार दिन भएको यस दुखद दुर्घटनामा विमानमा सवार कुल ६ जना मध्ये चार जनाको मृत्यु भएको पुष्टि भएको छ भने बाँकी दुई जनाको खोजी तथा उद्धार कार्य जारी रहेको जनाइएको छ ।

अमेरिकी सेनाको केन्द्रीय कमान्डका अनुसार यो दुर्घटना कुनै शत्रुतापूर्ण आक्रमण वा आफ्नै पक्षको अन्जानवश गरिएको प्रहार (फ्रेन्ड्ली फायर) का कारण भएको होइन ।

हाल यस घटनाको विस्तृत अनुसन्धान भइरहेको छ । सैन्य नियम अनुसार ज्यान गुमाउने सैनिकहरूको परिचय उनीहरूका परिवारलाई जानकारी गराएको २४ घण्टापछि मात्र सार्वजनिक गरिने बताइएको छ ।