काठमाडौं– अभियन्ता सुमन सायमी नेपाली कम्युनिस्ट पार्टी (नेकपा)मा प्रवेश गर्ने भएका छन् । बुधबार नेकपाको वृहत एकता तथा केन्द्रीय सदस्य सार्वजनिक गर्ने कार्यक्रममार्फत उनी नेकपामा प्रवेश गर्न लागेका हुन् ।

सायमीलाई नेपाल कम्युनिस्ट पार्टी नेकपाका संयोजक पुष्पकमल दाहाल ‘प्रचण्ड’ र सहसंयोजक माधवकुमार नेपाल लगायतले लामो समयदेखि पार्टीमा भित्र्याउन कसरत गरेका थिए । सायमीलाई नेकपाले केन्द्रीय सदस्य बनाएर पार्टीमा भित्र्याउन लागेको बुझिएको छ।

सायमीले खबरहबलाई दिएको जानकारी अनुसार ४० जना काठमाडौँका आदिवासी समुदायसहित उनी नेकपामा प्रवेश गर्न लागेका हुन् ।

‘म राष्ट्रिय मुक्ति पार्टीसँग असन्तुष्ट भएर नेकपामा प्रवेश गर्न लागेको होइन । अहिलेको आवश्यकता विभिन्न पार्टीबीचको ध्रुवीकरणकाे मागलाई मध्यनजर गर्दै हाम्रो समूह त्यता प्रवेश गर्न लागेको हो,’ सायमीले खबरहबलाई भने, ‘ढिलो चाँडो मुक्ति पार्टी पनि नेकपामा प्रवेश गर्ने कुरामा म ढुक्क छु।

सायमी काठमाडौँ क्षेत्र नम्बर ८ बाट चुनाव लड्ने तयारीमा रहेको समेत जानकारी गराएका छन्। यो क्षेत्रबाट २०७९ को निर्वाचनमा राष्ट्रिय स्वतन्त्र पार्टीका नेता विराजभक्त श्रेष्ठ विजयी भएका थिए। अहिले पनि श्रेष्ठ त्यही ठाउँबाट निर्वाचन लड्न रास्वपाबाट एकल सिफारिस भएका छन्।