काठमाडौं- अमेरिकी एआई कम्पनी एन्थ्रोपिकले स्मार्ट एआई मोडलहरुले आफ्नो प्रतिलिपि आफैँ बनाउनसक्ने सम्भावनाको जोखिम रहेको चेतावनी दिएको छ ।

एन्थ्रोपिकलाई उद्धृत गर्दै समाचार संस्था रोयटर्सका अनुसार साना एआई मोडलहरु केही महिनाभित्रै स्मार्ट ओभन र सस्ता एन्ड्रोइड टिभी बक्सजस्ता व्यावसायिक उपकरणमा आफैँ प्रतिलिपि बनाउने क्षमतासम्म पुग्ने सम्भावना छ । एन्थ्रोपिकले गरेको परीक्षणले यस्तो सम्भावनातर्फ संकेत गरेको हो।

एन्थ्रोपिकले एआई मोडलहरूले जोखिमयुक्त उपकरण पत्ता लगाउन, आफूलाई ती उपकरणमा ‘रेप्लिकेट’ गर्न र मानवीय सहायताबिना फैलिँदै जान सक्छन् कि सक्दैनन् भनेर परीक्षण गरेको थियो ।

३० अर्बभन्दा कम प्यारामिटर भएका साना मोडलले प्रतिलिपिका लागि चाहिने धेरै चरण पूरा गर्न सकेको कम्पनीले जनाएको छ ।

कम्पनीका अनुसार एकैपटक निष्क्रिय बनाउने कुनै केन्द्रीय स्विच नहुने भएकाले यसरी प्रतिलिपि हुने मोडललाई बन्द गर्न निकै कठिन हुन सक्छ । एन्थ्रोपिकले साधारण (एआई नभएका) मालवेयरभन्दा फरक यस्ता मोडलले अपरिचित उपकरणलाई आफैँ बुझेर प्रयोग गर्न सक्ने र डेटा सेन्टरका प्रोसेसरलाई समेत लक्षित गर्न सक्ने चेतावनी दिएको छ ।