काठमाडौं– नेपाली फिल्मलाई अन्तर्राष्ट्रिय बजारमा पुर्‍याउने लक्ष्यसहित तयार भएको ‘हिमालयन गोल्ड’ को ट्रेलर सार्वजनिक भएको छ। नेपालको इतिहास, संस्कृति र मौलिकतालाई विश्वमाझ चिनाउने उद्देश्य राखेको यो फिल्म कथावस्तुका साथै दिग्गज अभिनेता सुनिल थापाको अन्तिम फिल्म भएकाले पनि विशेष बनेको छ।

धिराज राजवंशीको निर्देशनमा बनेको सर्भाइभल कथामा आधारित फिल्म आगामी मंसिर ४ गतेदेखि प्रदर्शनमा आउनेछ। फिल्ममा सुनिल थापासँगै परीक्षा लिम्बू, कर्मा शाक्य, राहुल एन. मुखिया र सजन थापाको अभिनय छ।

यस फिल्मको अर्को महत्त्वपूर्ण पक्ष यसको अन्तर्राष्ट्रिय प्रदर्शन हो। निर्माण पक्षका अनुसार ‘हिमालयन गोल्ड’ भारतभर एकसाथ प्रदर्शन हुने पहिलो नेपाली फिल्म बनेको छ । 

यसका लागि भारतको चर्चित वितरण कम्पनी एए फिल्म्ससँग औपचारिक सम्झौता भइसकेको छ । 

उक्त कम्पनीले ‘दिलवाले दुल्हनिया ले जाएंगे’, ‘बाहुबली’, ‘आरआरआर’, ‘केजीएफ च्याप्टर २’ र ‘पुष्पा’ जस्ता चर्चित फिल्म वितरण गरिसकेको छ ।

निर्देशक राजवंशीका अनुसार फिल्म भारत, जापान र अस्ट्रेलियालगायत देशमा स्थानीय भाषाका सबटाइटलसहित नेपाली भाषामै प्रदर्शन गरिनेछ । फिल्मको मौलिकता जोगाउन हिन्दीमा डब गर्ने प्रस्ताव अस्वीकार गरिएको उनले बताए ।

निर्माता तथा वितरक नकिम उद्दिनले अन्तर्राष्ट्रिय बजारमा फिल्मको सम्भावना राम्रो रहेको उल्लेख गर्दै यसको प्रदर्शनले नेपाली चलचित्रलाई विश्व बजारमा विस्तार गर्न सहयोग पुग्ने विश्वास व्यक्त गरेका छन् ।