काठमाडौं– आम नागरिक तथा विद्यार्थीले दैनिक उपभोग गर्ने वस्तुमा बढ्दो महँगी, कालोबजारी र एलपी ग्यासको अभावप्रति अखिल (क्रान्तिकारी) ले गम्भीर आपत्ति जनाएको छ ।

संगठनले जारी गरेको प्रेस वक्तव्यमा बजारमा कृत्रिम अभाव सिर्जना गरी कालोबजारी, मुनाफाखोरी तथा बिचौलियाले जनतालाई दुःख दिएको आरोप लगाइएको छ ।

विशेषगरी सहर बजारमा कोठा भाडामा लिएर अध्ययन गरिरहेका विद्यार्थी, सुत्केरी महिला, वृद्धवृद्धा तथा दैनिक ज्यालादारीमा निर्भर नागरिकहरू ग्यास अभावका कारण प्रभावित भएको संगठनको भनाइ छ ।

अखिल (क्रान्तिकारी) ले सरकारसँग कोठा भाडामा बसेर अध्ययन गरिरहेका विद्यार्थी, सुत्केरी महिला, वृद्धवृद्धा तथा विपन्न नागरिकलाई प्राथमिकताका आधारमा नियमित र सहज रूपमा एलपी ग्यास उपलब्ध गराउन माग गरेको छ ।

त्यस्तै, अस्वाभाविक मूल्यवृद्धि तत्काल नियन्त्रण गर्न, कृत्रिम अभाव र कालोबजारी गर्नेहरूमाथि कडा कारबाही गर्न तथा अत्यावश्यक वस्तुको नियमित आपूर्ति सुनिश्चित गर्न पनि संगठनले सरकारको ध्यानाकर्षण गराएको छ ।

वक्तव्यमा माग तत्काल सम्बोधन नगरिए आम विद्यार्थी तथा पीडित जनताको साथमा सडक संघर्षमा उत्रने चेतावनी दिइएको छ ।

त्यसबाट उत्पन्न हुने परिस्थितिको जिम्मेवारी सरकार तथा सम्बन्धित राज्य निकायले लिनुपर्ने संगठनले जनाएको छ । अखिल (क्रान्तिकारी) का संयोजक डि. बि. बुढाथोकीद्वारा भदौ २८, २०८३ मा जारी गरिएको वक्तव्यमा यस्तो चेतावनी दिइएको हो ।