वाशिङ्टन- अमेरिकी नौसेनाको विमानवाहक पोत युएसएस अब्राहम लिङ्कनभित्रको अवस्थालाई लिएर प्रश्न उठेको छ । उक्त पोतमा लामो समयदेखि जारी तैनाथीका क्रममा खाद्यान्न अभाव, पानी तथा प्लम्बिङ समस्या र मानसिक स्वास्थ्य सङ्कट देखिएको रिपोर्ट सार्वजनिक भएको छ ।

रिपोर्ट सार्वजनिक भएपछि अमेरिकी कङ्ग्रेसमा डेमोक्रेटिक पार्टीको प्रतिनिधित्व गर्ने सांसदहरूले पोतमा रहेका सैनिकको अवस्थाबारे जवाफ मागेका छन् । सिनेटर रिचर्ड ब्लुमेन्थलले बुधबार युद्धमन्त्री पीट हेग्सेथलाई पत्र लेख्दै विमानवाहक पोतमा रहेका सैनिकको अवस्थाबारे नौसेनालाई जवाफदेही बनाउन आग्रह गरेका हुन् ।

उनका अनुसार युएसएस अब्राहम लिङ्कन विगत २५० दिनभन्दा बढी समयदेखि तैनाथ छ र २०० दिनभन्दा बढी समयसम्म बन्दरगाहमा नरोकी समुद्रमै रहेको अमेरिकी नौसेनाको रेकर्ड बनेको छ । ब्लुमेन्थलले लामो तैनाथीका क्रममा जहाजमा आधारभूत सामग्रीको अभाव, पानी प्रदूषण, प्लम्बिङ समस्या, बिग्रँदो मानसिक स्वास्थ्य तथा डेक सुरक्षासम्बन्धी चिन्ता देखिएको विभिन्न रिपोर्टलाई उल्लेख गरेका छन् ।

उनले यति लामो समयसम्म सैनिकलाई समुद्रमै राख्दा उनीहरूको स्वास्थ्य, सुरक्षा र कार्यक्षमतामा पर्न सक्ने असरबारे गम्भीर चासो व्यक्त गरेका छन् । सिनेटर रुबेन गालेगोले पनि सामाजिक सञ्जाल एक्समार्फत युएसएस लिङ्कनमा सिनेट प्रतिनिधिमण्डलबाट औपचारिक निरीक्षण भ्रमण गराउन आग्रह गरेका छन् । उनले जहाजमा देखिएको भनिएको चिन्ताजनक अवस्थाको प्रत्यक्ष अनुसन्धान आवश्यक रहेको बताएका छन् ।

अमेरिकाका प्रमुख सैन्य पत्रिकाहरुहरु नेभी टाइम्स र स्टार्स एण्ड स्ट्राइप्सले जनाए अनुसार युएसएस अब्राहम लिङ्कनभित्रको अवस्था खराब बन्दै जाँदा मानसिक तनावले सीमा नाघेपछि सैनिकहरुले जहाजबाट समुद्रमा हाम फाल्ने प्रयास समेत गरेका छन् । स्टार्स एण्ड स्ट्राइप्सका अनुसार उक्त पोतमा सवार आफ्ना प्रियजनहरूको अवस्थालाई लिएर परिवारहरु समेत चिन्तित छन् । पोतमा तैनाथ एक सैनिककी श्रीमतीका अनुसार उनका श्रीमानले ‘भोलि बिहान नउठ्नै पाए हुन्थ्यो’ भन्ने म्यासेज समेत पठाएका छन् ।

उता इरानको महर समाचार संस्थाले युद्धपोतमा हिंसात्मक झडपको भएको र सो क्रममा सात जना नौसैनिकको मृत्यु भएको दाबी गरेको छ । इरानकै तास्निम न्युज एजेन्सीले नौसैनिक र तिनीहरुका परिवारको गुनासो सम्बोधन गर्न अमेरिकी सेन्ट्रल कमाण्डका प्रमुख ब्राड कुपरका एक जना सल्लाहकार उक्त पोतमा पुगेपछि झडप भएको हो ।

युएसएस अब्राहम लिङ्कनले नोभेम्बर २१, २०२५ मा दक्षिण चीन सागरमा तैनाथीका लागि क्यालिफोर्नियाको सान डिएगोबाट यात्रा सुरु गरेको थियो । फेब्रुअरी २८ देखि इरानमा सुरु भएको अमेरिका–इजरायल सैन्य कारबाहीअघि उक्त विमानवाहक पोतलाई मध्यपूर्वतर्फ फर्काइएको थियो । लामो समयदेखि घर फर्कन नपाएका सैनिकका परिवारले पनि पछिल्ला दुई बैठकमा नौसेना नेतृत्वसँग जहाजमा रहेका करिब पाँच हजार नाविक तथा मरीनले सामना गरिरहेको कठिन अवस्थाबारे प्रश्न उठाएका थिए ।

परिवारका सदस्यहरूले खाद्यान्नको अभाव, लामो तैनाथी र आफ्ना आफन्त कहिले घर फर्कन पाउने भन्नेबारे स्पष्ट जानकारी मागेका थिए । केही परिवारले जहाजमा रहेका सैनिकमा गम्भीर मानसिक स्वास्थ्य समस्या देखिएको तथा आत्महत्या प्रयाससमेत भएको रिपोर्ट गरेका छन् ।

यसले लामो समयसम्मको तैनाथीले सैनिकको मानसिक स्वास्थ्यमा पारिरहेको प्रभावबारे थप चिन्ता बढाएको छ । गालेगोले बुधबारको आफ्नो पोस्टमा जहाजको अवस्था अत्यन्त गम्भीर रहेको दाबी गरेका छन् । उनका अनुसार केही चालक दलका सदस्यले जहाजबाट हामफाल्ने धम्की दिएको रिपोर्टसमेत आएको छ ।

उनले धुवाँले भरिएको स्नानकक्ष, कहिलेकाहीँ मात्र उपलब्ध हुने तातो पानी, सीमित गरिएको खाना र साबुन, बिग्रिएका शौचालय तथा दैनिक १२ देखि १६ घण्टासम्मको कामबारे उल्लेख गरेका छन् ।

गालेगोले अमेरिकी राष्ट्रपति डोनाल्ड ट्रम्पको नेतृत्वमा भइरहेको सैन्य कारबाहीका क्रममा अमेरिकी सैनिकसँग यस्तो व्यवहार हुनु ‘घृणित मात्र नभई खतरनाक’ समेत रहेको टिप्पणी गरेका छन् । अमेरिकी नौसेनाले भने जहाजमा रहेका सैनिकको अवस्थाबारे टिप्पणी गर्न एएफपीले गरेको अनुरोधको तत्काल जवाफ दिएको छैन ।

युएसएस अब्राहम लिङ्कनको लामो समयदेखिको तैनाथी, जहाजमा रहेका सैनिकको आधारभूत सुविधा तथा मानसिक स्वास्थ्यसँग सम्बन्धित रिपोर्ट र परिवारको बढ्दो चिन्ताले अमेरिकी सैन्य अभियानका क्रममा सैनिकको कल्याण र सुरक्षासम्बन्धी प्रश्नलाई पुनः चर्चामा ल्याएको छ ।