काठमाडौं– नेपाली कांग्रेसका नेता डा. शशांक कोइरालाले पार्टीका पूर्वसभापति शेरबहादुर देउवा नै आफूहरूको सभापति रहेको बताएका छन्। उनले देउवा स्वदेश फर्किएसँगै पार्टीभित्र देखिएको विवाद समाधान हुने र कांग्रेस एकताबद्ध हुने दाबी गरेका छन्।

करिब पाँच महिनापछि नेपाल फर्किन लागेका देउवालाई स्वागत गर्न बिहीबार त्रिभुवन अन्तर्राष्ट्रिय विमानस्थल पुगेका कोइरालाले सञ्चारकर्मीसँग कुरा गर्दै आफूहरू पार्टी विभाजनको पक्षमा नरहेको स्पष्ट पारे।

इतर पक्षको राष्ट्रिय भेला आयोजक समितिका संयोजकसमेत रहेका कोइरालाले आफूहरूको प्रयास पार्टीलाई एकताबद्ध बनाउनेतर्फ केन्द्रित रहेको बताए।

‘हाम्रो सभापति शेरबहादुर दाइ नै हो। हाम्रो प्रयास पनि पार्टी एकताकै लागि हो। हामी विभाजनको पक्षमा छैनौँ। शेरबहादुर दाइ आएपछि सबै कुरा मिल्छ,’ कोइरालाले भने। 

भदौ २३ र २४ गतेको आन्दोलनका क्रममा गम्भीर घाइते भएपछि देउवा उपचारका लागि विदेश गएका थिए। लामो समयपछि स्वदेश फर्किन लागेका देउवाको आगमनसँगै नेपाली कांग्रेसभित्रको नेतृत्व विवाद थप चर्चामा आएको छ।

देउवाकै नेतृत्वमा पार्टी निर्वाचनमा जान नसक्ने भन्दै गगन थापा पक्षले पुसको अन्तिम साता विशेष महाधिवेशन आयोजना गरी नयाँ कार्यसमिति चयन गरिसकेको छ। उक्त विशेष महाधिवेशनबाट थापा सभापति बनेका छन्।

यद्यपि, देउवा पक्षका नेताहरूले गगन थापालाई पार्टी सभापतिको रूपमा स्वीकार गरेका छैनन्।