सिन्धुपाल्चोक – सिन्धुपाल्चोकको बाह्रबिसे नगरपालिका–८ मानेश्वरास्थित भित्री सडक खण्डमा बुधबार साँझ टिपर दुर्घटना हुँदा एक जनाको मृत्यु भएको छ।

मानेश्वराबाट बाह्रबिसेसम्म् आउँदै गरेको बा ५ ख ४११० नम्बरको ढुङ्गा लोड टिपर साँझ करिब ६:५० बजे अनियन्त्रित भई दुर्घटना भएको प्रहरीले जनाएको छ। काभ्रेको पाँचखाल नगरपालिका–१३ का २५ वर्षीय अनिस पाण्डेले चलाएको उक्त टिपर अनियन्त्रित भएपछि टिपरमा सवार स्थानीय २९ वर्षीय राजु लामाले सडक छेउतर्फ हाम फालेका थिए। त्यसक्रममा पल्टिएको टिपरले च्यापिँदा उनी गम्भीर घाइते भएका हुन्।

घटनालगत्तै इलाका प्रहरी कार्यालय बाह्रबिसेबाट प्रहरी निरीक्षकको कमाण्डमा खटिएको टोलीले लामाको उद्धार गरी नगर अस्पताल बाह्रबिसे पठाएको थियो। उपचारका क्रममा साँझ ७:४५ बजे चिकित्सकले उनलाई मृत घोषणा गरेको प्रहरीले जनाएको छ।

प्रहरीका अनुसार कानुनी प्रक्रिया पूरा गरी शवको पोस्टमार्टम पश्चात् मृतकका बुवा हिराबहादुर तामाङलाई जिम्मा लगाइएको छ। दुर्घटनामा संलग्न टिपर चालकलाई नियन्त्रणमा लिएर थप अनुसन्धान भइरहेको इलाका प्रहरी कार्यालय बाह्रबिसेले जनाएको छ।