काठमाडौं- आयरल्यान्डको डेटा संरक्षण आयोग (डीपीसी) ले चिनियाँ अनलाइन व्यापारिक कम्पनी शेइनमाथि छानबिन सुरु गरेको छ । युरोपेली प्रयोगकर्ताहरूको डेटा चीन पठाएको विषयमा यो अनुसन्धान थालिएको हो । डीपीसी युरोपेली संघ (ईयू) मा शेइनको प्रमुख गोपनीयता नियामक निकाय हो ।

आयोगले शेइनको डब्लिनमा रहेको मुख्यालयले ईयूको गोपनीयता नियमहरू पालना गरे/नगरेको जाँच गर्नेछ । डीपीसीसँग नियम मिच्ने कम्पनीहरूलाई ठूलो रकम जरिवाना गर्ने अधिकार छ।

नियम अनुसार ईयूबाहिर डेटा पठाउँदा पनि प्रयोगकर्ताको गोपनीयता सुरक्षित हुनुपर्छ । डीपीसीका उप-आयुक्त ग्राहम डोयलले यो अनुसन्धान आफ्नो रणनीतिक प्राथमिकता भएको बताएका छन् । उनले चीनतर्फ हुने डेटा स्थानान्तरणमा आयोगको विशेष ध्यान रहेको स्पष्ट पारे ।

यस विषयमा शेइनका प्रवक्ताले आफ्नो कम्पनी विगत केही महिनादेखि डीपीसीसँग लगातार छलफलमा रहेको जनाएका छन् । कम्पनीले आफूहरू डेटा सुरक्षाका नियमहरू पालना गर्न पूर्ण रूपमा प्रतिबद्ध रहेको दाबी गरेको छ । शेइनले सन् २०२३ मा डब्लिनमा आफ्नो मुख्यालय खोलेको थियो ।

यसअघि गत वर्ष डीपीसीले प्रयोगकर्ताको विवरण सुरक्षित नराखेको भन्दै चिनियाँ एप टिकटकलाई पनि ५३ करोड युरो जरिवाना गरेको थियो । साथै टिकटकलाई चीनमा डेटा पठाउन रोक समेत लगाइएको थियो ।