काठमाडौं- आगामी आर्थिक वर्ष २०८३/०८४ को नीति तथा कार्यक्रम पढिरहेका बेला प्रधानमन्त्री वालेन्द्र शाहले संसद् छाडेर हिँडेपछि राष्ट्रपति रामचन्द्र पौडेलले सभामुख डोलप्रसाद अर्याललाई शीतल निवासमा बोलाएका छन्।

राष्ट्रपति पौडेल र सभामुख अर्यालबीच शीतल निवासमा मंगलबार मध्याह्न भेटवार्ता भएको हो ।

राष्ट्रपति भवन शीतल निवासमा मंगलबार भएको भेटवार्तामा समसामयिक विषयमा छलफल भएको पौडेलको सचिवालयले जनाएको छ ।

यता सभामुखको सचिवालयले भने अहिलेसम्म केही खुलाएको छैन । सोमबार राष्ट्रपति पौडेलले नीति तथा कार्यक्रम पढ्दा पढ्दै प्रम शाह संसद्‍बाट निस्केर हिँडेपछि चर्को विरोध भइरहेको छ।

अर्कातिर सभामुख अर्यालयमाथि पनि संसद्का सदस्यहरूलाई संसदीय मर्यादमा राख्न नसकेको आरोप लागिरहेको छ। नेपालको संसदीय इतिहासमै दुर्लभ तर अनपेक्षित गतिविधि प्रधानमन्त्रीले गरेपछि राष्ट्रपति संस्थाको मर्यादामै प्रश्न उठेको छ।

प्रधानमन्त्रीका राजनीतिक सल्लाहकार असिम शाहले अस्वस्थ भएका कारण संसद् छाड्नुपरेको जवाफ सामाजिक सञ्जालमा सोमबार नै दिएका थिए । तर उनले सामाजिक सञ्जालको उक्त पोस्ट तत्कालै हटाएका थिए ।

सोमबार नीति तथा कार्यक्रम प्रस्तुत गरिसकेपछि प्रधानमन्त्री शाह राष्ट्रपतिको बिदाइमासमेत देखिएनन्। राष्ट्रपतिलाई सभामुख अर्याल एक्लैले बिदा गरेका थिए ।