वासिङ्टन – प्राणघातक ‘हान्टाभाइरस’ को चपेटामा परेको क्रुज पानीजहाज ‘एमभी होन्डियस’ मा रहेका अन्तिम यात्रु र चालक दलका सदस्यको उद्धार गरी नेदरल्यान्ड्स पुर्‍याइएको छ । सोही क्रममा स्वदेश फिर्ता गरिएका एक अमेरिकी यात्रुमा भने श्वासप्रश्वास सम्बन्धी यो संक्रमण पोजिटिभ देखिएको छ ।

नेदरल्यान्ड्सको विदेश मन्त्रालयका अनुसार क्यानरी टापुमा रोकिएको उक्त पानीजहाजबाट सोमबार दुई वटा विमानमार्फत ६ यात्रु र १९ चालक दलका सदस्यसहित २८ जनाको उद्धार गरिएको हो ।

अमेरिकी अधिकारीका अनुसार हाल १८ जना अमेरिकी नागरिकलाई क्वारेन्टिनमा राखेर लक्षणको निगरानी भइरहेको छ । यता विश्व स्वास्थ्य संगठन (डब्लूएचओ) ले भने यो भाइरसको प्रकोपबाट सार्वजनिक जनस्वास्थ्यमा हुने जोखिम अझै पनि न्युन रहेको दाबी गरेको छ ।

हान्टाभाइरस मुख्यतया मुसा वा जनावरको मलमूत्र र र्‍यालबाट मानिसमा सर्ने गर्दछ । प्रभावित पानीजहाजबाट सबैको उद्धार गरिए पनि संक्रमण फैलिन नदिन उच्च सतर्कता अपनाइएको छ ।