काठमाडौं – मल्टिस्टारर एक्सन फिल्म ‘राम नाम सत्य’को ओपनिङ कमजोर देखिएको छ ।

आफ्नै निर्देशन र केन्द्रीय भूमिकामा बनेको ‘१२ गाउँ’ ब्लकबस्टर भएपछि नायक विराजले साइन गरेको ‘राम नाम सत्य’ले प्रदर्शनको सुरुवाती दिनमा ठूलो संख्याका दर्शकलाई हलसम्म तान्न सकेन ।

गीत, टिजर र ट्रेलर दर्शकले मन पराए पनि हलको कमजोर अकुपेन्सीले विराजको स्टारडम र क्रेज छर्लङै पारेको छ ।

यो फिल्ममा अन्य स्टारहरू नायक सुशील श्रेष्ठ, नायिकाहरू सुपुष्पा भट्ट र दिव्या रायमाझी पनि छन् । स्टार नै स्टार भएको फिल्मको व्यापार भने उत्साहजनक छैन । शुक्रबार र शनिबारको कमजोर अनुकपेन्सीका कारण हलहरूले आइतबार शो कटौती गरेका छन् ।

तथापि, शुक्रबारभन्दा शनिबार दर्शक बढेको र अकुपेन्सी चित्त बुझ्दो रहेको नायक विराज भट्ट बताउँछन् ।

उनी भन्छन्, ‘शुक्रबार दर्शकको उपस्थिति राम्रो थियो । शनिबार झन् बढ्यो । बिस्तारै बढ्नु राम्रो हो, पहिला धेरै दर्शक आएर स्वात्तै घट्नुभन्दा ।’

निर्माण पक्षले टिकटकर आयुषसिंह ठकुरीलाई फिल्मको शीर्ष कलाकारका रुपमा प्रचार गरेको थियो । तर, फिल्ममा उनको स्क्रिन टाइम निकै कम छ ।

फिल्मको अन्तिममा ‘राम नाम सत्य २’ बन्ने जानकारी दिएको छ । आयुषको उपस्थिति सिक्वेलका लागि स्थापित गर्न मात्रै गराइएको छ ।

पहिलो भाग नै नचलेका कारण सिक्वेल नबेको उदाहरणहरू टन्नै छन् । ‘राम नाम सत्य’लाई व्यापारिक रुपमा सफल हुन उत्तिकै सकस देखिन्छ ।

यो भएको खण्डमा सिक्वेल बन्ला त ? आयुषले अभिनय गर्न पाउलान् त ?

फिल्मका नायक विराज भट्ट भने सिक्वेल बन्ने दाबी गर्छन् । केही प्रतिशत छायाङ्कन भइसकेको बताउँदै सिक्वेलबारे ढुक्क रहन दर्शकलाई आश्वासन दिए ।

माइकल चन्दको निर्देशनमा यो फिल्म बनेको हो ।