काठमाडौं- पाकिस्तानको सिन्ध प्रान्तस्थित बदिन जिल्लाको एक तटीय गाउँका बासिन्दाहरूले विगत पाँच वर्षदेखि सरकारी प्राथमिक विद्यालय बन्द हुँदा आफ्ना बालबालिका शिक्षाको अवसरबाट वञ्चित भएको भन्दै गम्भीर चिन्ता व्यक्त गरेका छन् । युनियन काउन्सिल भुग्रा मेमन अन्तर्गत पर्ने शेख कारेहियो भण्डारी गाउँको सो विद्यालय भवन अहिले जीर्ण अवस्थामा पुगेको छ ।

त्यहाँ कुनै पनि शिक्षकको व्यवस्था गरिएको छैन। स्थानीयका अनुसार झुपडी जस्तो देखिने विद्यालयको संरचना खण्डहरमा परिणत भइरहँदा पनि सम्बन्धित शिक्षा विभाग र अधिकारीहरूले कुनै चासो देखाएका छैनन्।

विद्यालय बन्द भएपछि गाउँका बालबालिकाहरू आधारभूत शिक्षाका लागि टाढाका क्षेत्रमा जान बाध्य छन् । तर साना विद्यार्थीहरूका लागि कठिन र धेरै परिवारका लागि यो आर्थिक रूपमा असम्भव प्रायः छ ।

सरकारले शिक्षाको प्रवर्द्धन गर्ने र नयाँ शिक्षक भर्ना गर्ने ठूला-ठूला घोषणा गरे पनि ग्रामीण भेगका यस्ता विद्यालयहरू वर्षौँसम्म बन्द रहनुले प्रशासनिक कमजोरी र बेवास्तालाई उदाङ्गो पारेको स्थानीयको आरोप छ। गाउँलेहरूले शिक्षा विभागका उच्च अधिकारी, जिल्ला प्रशासन र निर्वाचित प्रतिनिधिहरूलाई तत्काल विद्यालयको मर्मत सम्भार गर्न र शिक्षक नियुक्त गरी बालबालिकाको भविष्य जोगाउन माग गरेका छन्।

तटीय क्षेत्रको यो अन्तिम बस्तीका बासिन्दाहरूले शिक्षा बिना आफ्ना बालबालिकाको भविष्य अन्धकारमा पर्ने भन्दै विद्यालय पुनः सञ्चालनका लागि तत्काल कदम चाल्न सरकारलाई दबाब दिएका छन्।