तेहरान– इरानका नयाँ सर्वोच्च नेता मोज्ताबा खामेनेईको स्वास्थ्य अवस्थाबारे गम्भीर दाबी सार्वजनिक भएको छ। केही अन्तर्राष्ट्रिय सञ्चारमाध्यमका रिपोर्ट अनुसार इरानका नयाँ सर्वोच्च नेता मोज्ताबा खामेनेई गम्भीर घाइते भएर कोमामा रहेको दाबी गरिएको छ।

रिपोर्टअनुसार उनको एउटा खुट्टा काटिएको छ। त्यसैगरी पेटसहित कलेजोमा गम्भीर क्षति पुगेको बताइएको छ।

बेलायती अनलाइन मिररले स्रोतलाई उद्धृत गर्दै लेखेअनुसार उनी हाल सिना युनिभर्सिटी अस्पतालको सघन उपचार कक्ष (आईसीयू) मा उपचाररत छन्। अस्पतालको केही भाग सुरक्षा निकायले बन्द गरेर कडा सुरक्षा व्यवस्था मिलाएको छ।

इरानकोराजधानी तेहरानबाट उद्धृत स्रोतलाई आधार मान्दै प्रकाशित रिपोर्टमा अस्पतालको ट्रमा टिमसँग सम्पर्कमा रहेका व्यक्तिले यस्तो जानकारी दिएको दाबी गरिएको छ।

ती व्यक्तिका अनुसार खामेनेईको अवस्था ‘अत्यन्त गम्भीर’ रहेको छ। रिपोर्टमा उनलाई इरानका स्वास्थ्य मन्त्रीसमेत रहेका ट्रमा सर्जन मोहम्मद रेजा जाफार्ग्जानीको निगरानीमा उपचार गरिरहेको उल्लेख गरिएको छ।

यद्यपि खामेनेईको चोटपटक कसरी लागेको हो भन्ने विषयमा स्पष्ट विवरण सार्वजनिक भएको छैन। केही रिपोर्टले हालको युद्धको सुरुवातमा बुवा अली खामेनेईको मृत्यु भएको आक्रमणकै क्रममा उनी घाइते भएको हुन सक्ने अनुमान गरेका छन्।

यसैबीच इरानी सरकारी टेलिभिजनले उनलाई ‘जनबाज’ अर्थात् शत्रुको आक्रमणबाट घाइते भएको व्यक्ति भनेर उल्लेख गरेको छ। उक्त प्रसारणमा वर्तमान युद्धलाई ‘रमजान युद्ध’ भन्दै खामेनेई घाइते भएको उल्लेख गरिएको थियो।

उनलाई नयाँ सर्वोच्च नेताको रूपमा घोषणा गरिएपछि तेहरानका सडकमा समर्थकहरू जम्मा भएर नाराबाजी र उत्सव मनाएको दृश्य पनि इरानी सरकारी टेलिभिजनले प्रसारण गरेको बताइएको छ। हालसम्म इरान सरकारले भने खामेनेईको स्वास्थ्य अवस्थाबारे आधिकारिक रूपमा विस्तृत पुष्टि गरेको छैन।