काठमाडौं- होर्मुज जलडमरूमध्य नजिकै एउटा जर्मन मालवाहक जहाजलाई लक्षित गरी क्षेप्यास्त्र प्रहार भएको छ ।

जर्मन जहाज कम्पनी ‘ह्यापाग-ल्योड’ का अनुसार ‘सोर्स ब्लेसिङ’ नामक कन्टेनर जहाज रणनीतिक रूपमा महत्वपूर्ण मानिने उक्त जलमार्ग नजिकै यात्रा गरिरहेको आक्रमण भएको हो ।

कम्पनीले जनाए अनुसार जहाजमा प्रत्यक्ष प्रहार नभए पनि क्षेप्यास्त्रका अवशेषहरू खस्दा जहाजमा आगलागी भएको थियो ।

विश्वको ठूलो कन्टेनर जहाज कम्पनीमध्येको एक ह्यापाग-ल्योडले हाल उक्त आगलगी नियन्त्रणमा आइसकेको र चालक दलका सबै सदस्यहरू सुरक्षित रहेको जनाएको छ ।

पश्चिम एशियामा बढ्दो युद्धका कारण यस कम्पनीले खाडी क्षेत्रका सबै कार्गो बुकिङहरू अर्को सूचना नभएसम्मका लागि स्थगित गर्ने घोषणा गरेको भोलिपल्टै यो आक्रमण भएको हो ।

यसअघि अर्को ठूलो जहाज कम्पनी माएर्स्कले पनि सुरक्षाको कारण देखाउँदै यस्तै कदम चालिसकेको छ ।