काठमाडौं- इटालीसँग नेपालले लज्जास्पद हार व्यहोरेको छ । आईसीसी टी २० विश्वकप क्रिकेट प्रतियोगिताअन्तर्गत बिहीबार सम्पन्न खेलमा नेपाल इटालीसँग १० विकेटले पराजित भयो ।

नेपालले दिएको १ सय २४ रनको झिनो लक्ष्य इटालीले ११ ओभर ४ बलमा कुनै विकेट नगुमाइ भेट्टायो ।

ब्याटिङ र बलिङ दुबै क्षेत्रमा निरीह देखिएको नेपालका बलरले इटालीको कुनै पनि विकेट लिन सकेनन् । इटालीको जितमा ओपनिङमा आएका मोस्का दाजुभाइले उत्कृष्ट प्रदर्शन गरे ।

खेलमा दाजु एन्थोनी मोस्काले ३२ बलमा ६२ रन बनाए । यस क्रममा उनले तीन चौका र छ छक्का प्रहार गरे । त्यस्तै, भाइ जस्टिन मोस्काले पनि ४४ बलमा ६० रन बनाए । यस क्रममा उनले पाँच चौका र तीन छक्का प्रहार गरे ।

इटालीविरुद्ध नेपाली बलर निरीह देखिए । एक ओभर बलिङ गरेका ललित राजवंशीले १९ रन दिए । त्यस्तै, एक ओभर बलिङ गरेका नन्दन यादवले १२ रन दिए ।

दुई ओभर बलिङ गरेका करण केसीले २१ रन दिए । तीन ओभर बलिङ गरेका सन्दीप लामिछानेले ३१ रन दिए ।

यसअघि टस हारेर पहिला ब्याटिङको निम्तो पाएको नेपालले १९ ओभर ३ बलमा सबै विकेट गुमाउँदै १२३ रन बनाएको हो ।

इटलीका क्रिशन कालुगामेजले सर्वाधिक तीन विकेट लिए । बेन मानेन्टीले दुई विकेट लिँदा अली हसन र जेजे स्मट्सले समान १–१ विकेट लिए ।

नेपालबाट सर्वाधिक रन बनाउने आरिफ शेख हुन् । उनले २४ बलमा तीन चौकाको सहयोगमा २७ रन जोडे । ओपनर कुशल भुर्तेल आजको खेलमा चल्न सेकनन् । १० बल खर्चेर उनले ५ रन जोडे ।

उनी दोस्रो ओभरको अन्तिम बलमा आउट भएका थिए । दोस्रो विकेटका रुपमा कप्तान रोहित पौडेल ६ ओभरको अन्तिम बलमा आउट भए । रोहितले १४ बलमा २३ रन जोड्न २ छक्का प्रहार गरे ।

तेस्रो विकेटका रुपमा आशिफ शेख ७ ओभरको दोस्रो बलमा आउट हुँदा नेपाल ४९ रनको कमजोर अवस्थामा थियो । आशिफले २० बलमा २० रन मात्रै जोडे । १३ ओभरमा पाँचौ बलमा अलराउन्डर दीपेन्द्रसिंह ऐरी आउट भए ।

चौथो विकेटका रुपमा उनी आउट हुँदा नेपाल ९६ रनको कमजोर अवस्थामा थियो । दीपेन्द्र आउट भएपछि नेपालको ब्याटिङ लोकेश बम, आरिफ शेख र गुल्सन झाको भरमा थियो । आरिफले २७ रन जोडे ।

लोकश र गुल्सनलाई इटलीका बलरले क्रिजमा टिक्नै दिएनन् । यी दुई ३–३ रनको अवस्थामा आउट भए । करण केसीले ब्याटिङ उकास्न प्रयास गरे । उनले ११ बलमा १८ रन जोड्न एक चौका र १ छक्का प्रहार गरे ।

समग्रमा नेपालका सुरुवाती क्रमका ब्याटरहरुले टिक्न नसक्दा नेपालको ब्याटिङ दबाबमा पर्दै गएको थियो । १४ आभेरपछि दबाबमा परेको ब्याटिङ उकास्नु पर्ने जिम्मेवारीका साथ क्रिजमा गएका ब्याटरहरु टिक्न नसक्दा नेपाल निरीह बन्न पुग्यो ।