काठमाडौं – यही शुक्रबारबाट प्रदर्शनमा आउन लागेको फिल्म ‘श्री बुकुरो : द होम कलिङ’को प्रिमियर सम्पन्न भएको छ ।

निर्माण पक्षले बुधबार साँझ कमलपोखरीस्थित एक फिल्म हलमा प्रिमियर आयोजना गरेको थियो ।

प्रिमियरमा निर्देशक तुलसी घिमिरे, दीपकप्रसाद आचार्य, निर्माता छबि ओझा र नायक जयकिशन बस्नेत लगायतका कलाकार उपस्थित थिए ।

फिल्मका शीर्ष कलाकार वरिष्ठ नायिका लक्ष्मी गिरी, नायक आर्शिवाद क्षेत्री र नायिका निकिता उप्रेतीले अतिथिहरुसँगै बसेर फिल्म हेरेका थिए ।

पूरानो घरसँग जोडिएको पारिवारिक कथामा बनेको फिल्म ‘श्री बुकुरो’ हेरेपछि निर्देशक तुलसी घिमिरेले आफू नोस्टाल्जिक भएको प्रतिक्रिया दिए ।

उनले भने, ‘फिल्म हेरिरहँदा यसले मलाई पुरानो घरमा पुर्‍यायो। लक्ष्मी जीको अभिनयले मेरी आमालाई सम्झेँ । फिल्म राम्रो बनेको छ ।’

नायक बस्नेतले फिल्म हेर्दा उपन्यास पढिरहेको महसुस गराएको प्रतिक्रिया दिए ।

उनले थपे, ‘यो फिल्ममा कमेडी पनि छ। पारिवारिक सम्बन्धको कुरा र सबै कलाकारको अभिनय एकदम मन पर्‍यो। लक्ष्मी दिदीको अभिनय मनमा बस्ने खालको छ।’

यो फिल्मको लेखक तथा निर्देशक सुदीप भुपाल सिंह हुन् ।