काठमाडौं– बलिउडदेखि हलिउडसम्म सफल यात्रा तय गरेकी अभिनेत्री प्रियंका चोपडा र पप स्टार निक जोनस यतिबेला व्यक्तिगत जीवनका कारण चर्चामा छन् । 

हाल सामाजिक सञ्जालमा उनीहरू अलग्गिएको हल्ला चलेपछि प्रियंकाले यसबारे मुख खोलेकी छन्। सन् २०१८ मा केही महिनाको डेटिङपछि विवाह गरेका यो जोडी सुरुदेखि नै उमेर अन्तर, फरक देश, फरक धर्म र अन्तरसांस्कृतिक विवाहका कारण आलोचनाको केन्द्रमा रहँदै आएको थियो। 

विवाहपछि पनि उनीहरूले निरन्तर ट्रोलिङ र नकारात्मक टिप्पणीको सामना गर्नुपरेको थियो। हालै ‘भेराइटी’सँगको अन्तर्वार्तामा प्रियंकाले हल्लालाई स्पष्ट रूपमा खण्डन गर्दै आफूहरू आठ वर्षदेखि सँगै रहेको बताइन्। 

उनले भनिन्, ‘यदि मानिसहरू हाम्रो सम्बन्ध टुट्ने प्रतीक्षा गरिरहेका छन् भने त्यो उनीहरूको रोजाइ हो।’ 

बाहिरी आलोचनाभन्दा आफूहरूले एकअर्कामा विश्वास र साथ खोजेको उनले जोड दिइन्। प्रियंकाले निकसँग छ महिनाको सम्बन्धपछि विवाह गर्नु आफ्नो जीवनको साहसी निर्णय भएको बताइन्। 

सुरुवातमा त्यो निर्णय अविश्वसनीय जस्तो लागे पनि निकको इमानदारी र साथले आफूलाई हरेक दिन प्रेरित गर्ने उनले खुलासा गरिन्। उनले निक मात्र नभई जोनस परिवारप्रति पनि आभार व्यक्त गरिन्।