काठमाडौं- आईसीसी टी–२० विश्वकप अन्तर्गत बिहीबारको खेलमा श्रीलंकाले ओमनलाई पराजित गरेको छ । समूह ‘बी’ मा रहेको श्रीलंकाले ओमनलाई १ सय ५ रनको विशाल अन्तरले पराजित गरेको हो ।

२ सय २६ रनको लक्ष्य पछ्याएको ओमान निर्धारित २० ओभरमा ९ विकेट गुमाएर १ सय २० रनमा समेटियो ।

उसका लागि मोहम्मद नदीमले सर्वाधिक ५३ तथा वसीम अलीले २७ रन बनाए । बाँकी खेलाडीले दोहोरो अंकको स्कोर बनाउन सकेनन् ।

ओमानलाई सस्तैमा समेट्न दुसमन्ता चमिरा र मथिसा थिकसनाले दुई–दुई विकेट लिए ।

त्यसअघि श्रीलंकाको पल्लेकेले मैदानमा टस हारेर पहिले ब्याटिङ गरेको श्रीलंकाले निर्धारित २० ओभरमा ५ विकेटको क्षतिमा २२५ रन जोड्यो ।

श्रीलंकाका कुशल मेन्डिसले ६१, पवन रत्नायकेले ६० तथा दाशुन शनाकाले ५० रन जोडे ।

बलिङतर्फ ओमानका जितेन रमानन्दीले दुई विकेट लिए ।