काठमाडौं- नेपाली कांग्रेसका सभापति शेरबहादुर देउवाको निवास महाराजगञ्जमा संस्थापन पक्षको छलफल चलिरहँदा नेता डा. शेखर कोइराला विशेष महाधिवेशन पक्षधरको सन्देश लिएर पुगेका छन् ।

देउवाले आफूनिकट नेताहरूसँग बैठक गरिरहँदा कोइरालाले महामन्त्रीद्वय विश्वप्रकाश शर्मा र गगन थापाको सन्देशसहित महाराजगञ्जमा इन्ट्री मारेका हुन् ।

संस्थापन पक्षको बैठक बसिरहेकै बेला शेखर सहमहामन्त्रीद्वय जीवन परियार, बद्री पाण्डे र नेता मिलेन्द्र रिजाल लिएर त्यहाँ पुगेका थिए ।

‘हामी देउवा निवास पुगेर छलफल गर्‍यौँ। यहाँ संस्थापन पक्षकै नेताहरू पनि उपस्थित छन्’, बैठकमा सहभागी एक नेताले खबरहबलाई भने, ‘संस्थापन पक्ष र शेखरनिकट नेताहरूबीच सल्लाह गरिरहेका छौं ।’

नेपाली कांग्रेसको विशेष महाधिवेशन नयाँ नेतृत्व चयनतर्फ उन्मुख भएपछि देउवाले अहिले कानुनविदहरूसँग पनि छलफल गरिरहेका छन् । त्यहीँ शेखरले विशेष महाधिवेशन पक्षधरको सन्देश पुर्‍याएका हुन् । तर उनले न्यूनतम् सहमतिको प्रस्तावमा केके छ भन्ने खुलाएका छैनन् ।

एकजना नेताका अनुसार देउवाले आफू कानुनविदहरूसँग पनि छलफलमा रहेको जानकारी शेखरलाई दिएका छन्। देउवाले रमेश लेखकसहित नेता कार्यकर्ता र कानुनविदहरूसँग पनि परामर्श गरिरहेको स्रोतको दाबी छ।