काठमाडौं– नेपाली कांग्रेसको विशेष महाधिवेशनले नयाँ केन्द्रीय कार्यसमिति निर्वाचन गर्ने भएको छ । 

चौधौँ महाधिवेशनबाट निर्वाचित कार्यसमितिको पदावधि समाप्त भइसकेकाले १५ औँ महाधिवेशन सम्पन्न नहुँदासम्मको लागि नयाँ केन्द्रीय कार्यसमिति निर्वाचन गर्ने कार्यविधि विशेष महाधिवेशनमा प्रस्तुत गरिएको हो ।

‘नेपाली कांग्रेसको चौधौँ महाधिवेशन २०७८ (मंसिर २४ देखि २८) बाट निर्वाचित मौजुदा केन्द्रीय कार्यसमितिको पदावधि समाप्त भइसकेकोले केन्द्रीय कार्यसमितिको विघटन गर्ने र नेपाली कांग्रेसको १५ औँ महाधिवेशन सम्पन्न नहुँदासम्मको लागि नयाँ केन्द्रीय कार्यसमितिको निर्वाचन’, विशेष महाधिवेशनमा पारित कार्यविधिमा उल्लेख छ ।

साथै, कार्यविधिमा नयाँ कार्यसमितिको निर्वाचन गर्न ५ सदस्यीय निर्वाचन समितिको गठन गर्ने, महाधिवेशनको निर्णय प्रमाणित गर्न ५ सदस्यीय प्रमाणीकरण समिति गठन गर्ने विषय पनि पारित भएको कार्यविधिमा उल्लेख छ ।

त्यस्तै, कार्यविधिमा केन्द्रीय निर्वाचन समिति, केन्द्रीय अनुशासन समिति र केन्द्रीय लेखा समितिको विघटन गर्ने प्रस्ताव पनि उल्लेख छ ।