काठमाडौं – रुसबाट बढ्दो सुरक्षा चुनौती र युक्रेनका समर्थक देशविरुद्ध तोडफोड तथा हस्तक्षेपका घटना बढिरहेको आरोपका बीच उत्तर एटलान्टिक सन्धि सङ्गठन (नेटो) ले सम्भावित आक्रमणको प्रतिरोध गर्न आफू सक्षम रहेको सन्देश रुसलाई दिने तयारी गरेको छ ।

नेटोका सर्वोच्च सहयोगी कमान्डर युरोपका अमेरिकी जनरल एलेक्सस ग्रिन्केविचले पोल्यान्डको वार्सामा आयोजना हुने सुरक्षा सम्मेलनमा गठबन्धनको ‘विजयको सिद्धान्त’ प्रस्तुत गर्ने अधिकारीहरूले बताएका छन् । उक्त सम्बोधनमार्फत आक्रमणको प्रतिरोध गर्न र आवश्यक परे त्यसलाई परास्त गर्न नेटो सक्षम रहेको स्पष्ट पार्ने अपेक्षा गरिएको छ ।

जर्मनीको एक विमानस्थलमा विस्फोटक पदार्थ बोकेको ड्रोन फेला परेपछि युरोपमा रुसको गतिविधिबारे चिन्ता बढेको छ । पश्चिमी अधिकारीहरूले युक्रेनलाई समर्थन गर्ने देशविरुद्ध मस्कोले तोडफोड र हस्तक्षेपका गतिविधि बढाएको आरोप लगाउँदै आएका छन् ।

रुसको सम्भावित आक्रमण रोक्न नेटोले आफ्नो रक्षा योजनालाई गोप्य राख्दै आएको छ । नयाँ सम्बोधनमा रणनीतिका विस्तृत विवरण सार्वजनिक हुने सम्भावना कम भए पनि यसले रुसलाई चेतावनी दिनुका साथै पूर्वी युरोपका सदस्य राष्ट्रलाई सुरक्षा प्रत्याभूति दिलाउने अपेक्षा गरिएको छ ।

यसैबीच, अमेरिकी रक्षा मन्त्रालयले युरोपमा तैनाथ अमेरिकी सेनाको सङ्ख्या र भूमिकाबारे समीक्षा गरिरहेको छ । युरोपमा अमेरिकी सैनिकको सङ्ख्या कटौती हुन सक्ने चिन्ताका बीच युरोपेली देशहरूले आफ्नै सैन्य क्षमता सुदृढ बनाउने प्रयास तीव्र पारेका छन् । अमेरिकी रक्षा मन्त्रालयको समीक्षाको नतिजा यस वर्षको अन्त्यसम्म सार्वजनिक हुने अपेक्षा गरिएको छ ।