ताप्लेजुङ- जिल्ला प्रशासन कार्यालय ताप्लेजुङले चाडपर्वका बेला दैनिक उपभोग्य वस्तुको कृत्रिम अभाव सिर्जना नगर्न, अस्वाभाविक मूल्यवृद्धि नगर्न र गुणस्तरहीन वस्तु बिक्री वितरण नगर्न व्यवसायीलाई आग्रह गरेको छ ।

अत्यावश्यक वस्तुको कृत्रिम अभाव सिर्जना गर्ने, अनावश्यक भण्डारण गरी कालोबजारी गर्ने तथा विभिन्न बहानामा मूल्य बढाउने गरेको जनगुनासो बढेपछि प्रशासनले व्यवसायीलाई सचेत गराएको हो ।

प्रशासनले आज सूचना जारी गर्दै खाद्यान्न, दाल, नुन, तेल, चिनी, ग्यास, पेट्रोलियम पदार्थ र औषधिजस्ता अत्यावश्यक वस्तुको आपूर्ति सहज, सुलभ र नियमित बनाउन सम्बन्धित सबै निकायलाई अनुरोध गरेको छ ।

प्रमुख जिल्ला अधिकारी उमेशकुमार दाहालले बजारमा कृत्रिम अभाव, अस्वाभाविक मूल्यवृद्धि, कालोबजारी, कार्टेलिङ तथा गुणस्तरहीन वस्तुको बिक्री वितरणसम्बन्धी गुनासा प्राप्त भएकाले यस्ता गैरकानुनी गतिविधि नगर्न र नगराउन सचेत गराइएको बताए।

चाडपर्वका समयमा उपभोक्तालाई आवश्यक वस्तु सहज रूपमा उपलब्ध गराउन तथा बजारमा हुने अनुचित गतिविधि नियन्त्रण गर्न प्रशासनले सबै सरोकार भएका पक्षलाई जिम्मेवार बन्न आग्रह गरेको छ । प्रशासनको आग्रहविपरीत कार्य गरेको पाइएमा कानुनी कारबाही गरिने सूचनामा उल्लेख छ ।