भक्तपुर- बागमती प्रदेश सरकारले रसुवाको भोटेकोशी क्षेत्रमा बाढीबाट प्रभावित नागरिकका लागि १६ जना मनोपरामर्शदाता परिचालन गरेको जनाएको छ।

नेपाल प्रेस सोसाइटी सूर्यविनायक, भक्तपुरले आयोजना गरेको कार्यक्रममा बागमती प्रदेशका मुख्यमन्त्री किरण थापामगरले बाढी प्रभावित क्षेत्रमा मनोपरामर्शदाता खटाइएको जानकारी दिएका हुन्। उनका अनुसार बाढीपहिरोबाट सात हजारभन्दा बढी मानिस प्रभावित भएका छन्।

मुख्यमन्त्री थापामगरले बाढीका कारण अभिभावक गुमाएका बालबालिकालाई कक्षा १२ सम्मको शिक्षा सुनिश्चित गरिने बताए। आवश्यकताअनुसार त्यस्ता बालबालिकाका लागि तत्काल आवासीय विद्यालयको व्यवस्था गरिने उनको भनाइ छ।

रसुवामा भदौ १० गते विनाशकारी बाढी आएपछि प्रदेश सरकारले स्थानीय तथा सङ्घीय सरकारसँग समन्वय गरी उद्धार र राहतलाई प्राथमिकतामा राखेर काम गरिरहेको मुख्यमन्त्री थापामगरले बताए।

बाढीपहिरोका कारण बागमती प्रदेशका रसुवा, नुवाकोट, धादिङ र चितवन जिल्लाका विभिन्न स्थानीय तह प्रभावित भएका छन्। विपद्का कारण ती जिल्लामा ठूलो मानवीय तथा भौतिक क्षति भएको प्रदेश सरकारले जनाएको छ।

बाढीमा ज्यान गुमाएकाको शव व्यवस्थापन तथा अन्त्येष्टिका लागि प्रदेश सरकारले प्रतिमृतक २५ हजार रुपैयाँका दरले सहयोग उपलब्ध गराएको मुख्यमन्त्री थापामगरले जानकारी दिए

त्यस्तै, बाढीपहिरोका कारण अवरुद्ध सडक सञ्चालन गर्न भौतिक पूर्वाधार मन्त्रालयअन्तर्गतका पूर्वाधार विकास कार्यालयमार्फत नुवाकोट र रसुवातर्फ मेसिन परिचालन गरिएको छ। सडक सञ्चालनका लागि आवश्यकताअनुसार वैकल्पिक मार्ग निर्माणको कामसमेत भइरहेको प्रदेश सरकारले जनाएको छ।

प्रदेश विपद् व्यवस्थापन कोषबाट विपद् प्रभावित जिल्लालाई तत्काल राहत रकम उपलब्ध गराउने निर्णयसमेत गरिएको मुख्यमन्त्री थापामगरले बताए।