काठमाडौं- सिरियाका राष्ट्रपति अहमद अल-शाराले विदेशी लडाकुहरूलाई सिरियाली सेनामा समायोजन गर्ने र नागरिकता प्रदान गर्ने नीतिको चीनले कडा विरोध गरेको छ। बेइजिङले यसलाई आफ्नो राष्ट्रिय सुरक्षामाथिको प्रत्यक्ष खतराका रूपमा लिएको छ।

सिरियाली सरकारले चीनको सिन्जियाङ प्रान्तका उइग्युर लडाकुहरू संलग्न ‘तुर्कस्तान इस्लामिक पार्टी’ लाई विघटन गरी सेनाको ८४औँ वा ८८औँ डिभिजनमा मिसाउने तथा उनीहरूलाई कानुनी वैधता दिने कदम चालेको छ। चिनियाँ गुप्तचर, सैन्य र राजनीतिक निकायहरूले यस कदमले उइग्युर लडाकुहरूलाई सजिलै आवातजावत गर्न र चीनभित्रै घुसपैठ गर्न सक्ने बाटो खुलाउने बताएका छन्।

संयुक्त राष्ट्रसंघको सुरक्षा परिषद्को प्रतिबन्धित सूचीमा रहेको यस समूहलाई वैधानिकता दिनु अन्तर्राष्ट्रिय कानुनी मान्यताविपरीत भएको चीनको तर्क छ। यो सुरक्षा चासो सम्बोधन नभएसम्म चीनले सिरियाको पुनर्निर्माणमा आर्थिक सहयोग रोक्ने, बेल्ट एन्ड रोड इनिसिएटिभ अन्तर्गत ठूला लगानीहरू बन्द गर्ने तथा सिरियाली सरकारलाई कूटनीतिक रूपमा दबाब दिने नीति लिएको छ।