काठमाडौं – लाल सागरको बाब अल–मन्डेब जलडमरूमध्यमा हुथी विद्रोहीहरूले मालवाहक जहाजमाथि गरेको क्षेप्यास्त्र आक्रमणमा कम्तीमा ६ जनाको मृत्यु भएको छ। आक्रमणमा चार जना चालक दलका सदस्य र दुई जना उद्धारकर्मीको मृत्यु भएको यमनी अधिकारीहरूले बताएका छन्।

अन्तर्राष्ट्रिय समाचार संस्था रोयटर्सका अनुसार मंगलबार हुथीहरूले ‘तिहामाह’ नामक मालवाहक जहाजलाई लक्षित गरी आक्रमण गरेका थिए। जहाजमा रहेका चार चालक दलका सदस्य-तीन पाकिस्तानी र एक इन्डोनेसियाली नागरिक—को मृत्यु भएको छ। घटनास्थलमा उद्धारका लागि पुगेका हुथीविरोधी यमनी समूहसँग सम्बन्धित दुई उद्धारकर्मीसमेत मारिएका छन्। आक्रमणमा अन्य १० जना घाइते भएको जनाइएको छ।

हुथीहरूले जहाजमा ब्यालेस्टिक क्षेप्यास्त्र प्रहार गरेपछि आगलागी भएको थियो। उद्धार तथा अनुसन्धानका लागि टोली परिचालन भइसकेपछि पनि जहाजमाथि पुनः आक्रमण गरिएको र त्यसबाट उद्धारकर्मी तथा जहाजमा रहेका अन्य व्यक्तिको ज्यान जोखिममा परेको अधिकारीहरूले बताएका छन्।

प्रारम्भिक विवरणमा जहाज साउदी स्वामित्वको रहेको बताइए पनि जहाजको ट्र्याकिङ तथा समुद्री तथ्याङ्कले तिहामाह इजिप्ट र यमनमा दर्ता भएका कम्पनीसँग सम्बन्धित रहेको देखाएको रोयटर्सले जनाएको छ।

यो आक्रमण सन् २०२६ मा इरानसँगको युद्ध सुरु भएपछि हुथी समूहबाट व्यावसायिक पानीजहाजमाथि भएको पहिलो पुष्टि भएको घातक आक्रमण भएको बताइएको छ। लाल सागर र बाब अल–मन्डेब क्षेत्र विश्व व्यापारका लागि महत्वपूर्ण समुद्री मार्ग भएकाले पछिल्लो घटनाले अन्तर्राष्ट्रिय जल यातायातको सुरक्षाबारे थप चिन्ता बढाएको छ।