काठमाडौं- अस्ट्रेलियाले भारतलाई युरेनियम बिक्री गर्ने भएको छ। दुवै देशका प्रधानमन्त्रीबीच मेलबर्नमा भएको भेटवार्तामा शान्तिपूर्ण प्रयोजनका लागि युरेनियमसम्बन्धी सहमति भएको हो।

हतियार निर्माणमा प्रयोग हुन सक्ने चासोका कारण यो सम्झौता लामो समयदेखि रोकिएको थियो । नयाँ प्रशासनिक सम्झौतासँगै अब अस्ट्रेलियाबाट भारतमा युरेनियम निर्यातको बाटो खुलेको छ ।

अस्ट्रेलियासँग विश्वकै सबैभन्दा ठूलो युरेनियम भण्डार छ । भारतले सन् २०४७ सम्ममा आफ्नो देशमा आणविक ऊर्जा उल्लेख्य रूपमा बढाउने लक्ष्य राखेको छ। ऊर्जाको बढ्दो माग पूरा गर्न भारतलाई युरेनियमको आवश्यकता परेको हो ।

दुई नेताहरूले क्षेत्रकै सुरक्षा र रक्षा सहयोग बढाउने प्रतिबद्धता समेत जनाएका छन्। भारत र अस्ट्रेलियाबीचको व्यापारिक सम्बन्ध पनि निकै बलियो बन्दै गएको छ।