काठमाडौं- इरानले जोर्डनतर्फ २० मिसाइल प्रहार गरेको छ । जोर्डनको सेनाले इरानबाट प्रहार गरिएका २० वटा मिसाइलहरूलाई सफलतापूर्वक आकाशमै नष्ट गरिदिएको दाबी गरेको छ । जोर्डनको सरकार सञ्चालित पेट्रा समाचार एजेन्सीसँग कुरा गर्दै त्यहाँका एक सैन्य अधिकारीले यससम्बन्धी जानकारी दिएका हुन् ।

सैन्य स्रोतका अनुसार सेनाको रक्षा प्रणालीले मिसाइलहरूलाई बीचमै रोकेर नष्ट गरेपछि तिनका केही अवशेष र टुक्राहरू जमिनमा खसेका थिए । तर, यस घटनामा कुनै पनि मानवीय क्षति वा भौतिक नोक्सानी भने नभएको अधिकारीले स्पष्ट पारेका छन् ।

ती अवशेषहरूमा कुनै पनि प्रकारको विष्फोटक पदार्थ बाँकी नरहेको सुनिश्चित गर्नका लागि सेनाको इन्जिनियरिङ युनिटले आवश्यक जाँच र व्यवस्थापन गरिसकेको छ ।

यसअघि, इरानको इस्लामिक रिभोल्युसनरी गार्ड कोर (आईआरजीसी) ले जोर्डनमा रहेको अमेरिकाको अल-अजराक सैन्य अखडालाई लक्षित गरी लगातार दोस्रो रात पनि आक्रमण गरेको जनाएको थियो । अमेरिकाले इरानमा व्यापक हवाई हमला गरेपछि जवाफमा इरानले मिसाइल प्रहार गरेको हो ।