काठमाडौं– स्वास्थ्य तथा खाद्य स्वच्छता मन्त्रालयले वीपी कोइराला मेमोरियल क्यान्सर अस्पतालको अध्यक्ष पदका लागि आवेदन दिने चिकित्सकहरूको प्रारम्भिक सूची प्रकाशन गरेको छ ।

स्वास्थ्य मन्त्रालयले बुधबार प्रकाशन गरेको सूचना अनुसार आवेदन पेस गर्ने आवेदकहरू मध्येबाट वर्णानुक्रमका आधारमा सात जना चिकित्सकहरूको नामावली सार्वजनिक गरिएको हो । 

प्रारम्भिक सूचीमा सूचीकृत हुनेहरूमा डा. अजय कुमार झा (धनुषा), डा.जया श्रेष्ठ (चितवन), डा.भावना वाग्ले (चितवन), डा. योगेन्द्र प्रसाद सिंह (सर्लाही), डा. लक्ष्मी नारायण सिंह (महोत्तरी), डा. विजय चन्द्र आचार्य (चितवन) र डा.विश्वराम पौडेल (रामेछाप) रहेका छन् । 

मन्त्रालयका अनुसार छनोट प्रक्रियालाई अगाडि बढाउनका लागि ती उम्मेदवारहरूले बढीमा तीन हजार शब्दमा नबढ्ने गरी आफ्नो सोचपत्रु  बुझाउनुपर्ने व्यवस्था गरिएको छ । 

इच्छुक उम्मेदवारहरूले आगामी असार १ गते कार्यालय समयभित्र मन्त्रालयमा सोचपत्र बुझाइसक्नुपर्नेछ । उम्मेदवारहरूको अन्तर्वार्ताको मिति र स्थान भने सम्बन्धित आवेदकहरूलाई पछि जानकारी गराइने मन्त्रालयले जनाएको छ ।

गत १५ वैशाखमा प्रकाशित गरिएको सूचनामा आठ जनाको आवेदन परेको थियो ।