काठमाडौँ – राष्ट्रिय स्वतन्त्र पार्टी (रास्वपा) का सभापति रवि लामिछानेका दाजु एवं सञ्चारकर्मी हरिशरण लामिछानेले प्रधानमन्त्री वालेन्द्र (बालेन) शाह र वर्तमान राजनीतिक परिदृश्यमाथि तिखो व्यङ्ग्य प्रहार गरेका छन्। सामाजिक सञ्जालमा ‘आमा-छोरा संवाद भाग-२’ शीर्षक दिँदै उनले प्रतीकात्मक र व्यङ्ग्यात्मक शैलीमा प्रधानमन्त्री शाह, रास्वपा नेतृत्व र समसामयिक राजनीतिमाथि टिप्पणी गरेका हुन्।

लामिछानेले काल्पनिक संवादको सहारा लिँदै प्रधानमन्त्री शाहको कार्यशैली र संसद्प्रतिको दृष्टिकोणमाथि प्रश्न उठाएका हुन्। संवादमा आमाको पात्रमार्फत उनले भनेका छन्, “संसदमै नजाने हो भने ‘सीधा कुरा प्रधानमन्त्रीसँग’ भनेर टेलिभिजनमा बोलाएर र्‍याखर्‍याख्ती पार।” उनले प्रधानमन्त्री शाहको कूटनीतिक र राजनीतिक सम्बन्धलाई लिएर अमेरिकी राष्ट्रपति डोनाल्ड ट्रम्प, भारतीय प्रधानमन्त्री नरेन्द्र मोदी र चिनियाँ राष्ट्रपति सी चिनफिङको प्रकृतिको समेत चर्चा गर्दै कटाक्ष गरेका छन्।

संवादकै क्रममा लामिछानेले रास्वपा सभापति रवि लामिछानेतर्फ लक्षित गर्दै कानुनी विवाद, राजनीतिक समीकरण र फरार रहेका जिबी राईको विषयलाई पनि प्रतीकात्मक रूपमा उठाएका छन्। “अब त मुद्दा मामिला मिलाइहालिस, के को पाँच वर्ष? राजनीतिमा दुई तिहाइ, को आफ्नो? को पराई? हन कता छ जिबी राई ?” भन्दै उनले वर्तमान राजनीतिक अवस्थामाथि प्रश्न उठाएका छन्।

आफ्नो उक्त अभिव्यक्ति राजनीतिक रिसइबी नभई असल नियतको आलोचना भएको उनले स्पष्ट पारेका छन्। “माया प्रेमले सम्झाउन नसकेपछि असल नियतले हानेको झटारो हो, चित्त नबुझ्नेले कडा व्यङ्ग्य गर्न सक्नुहुन्छ,” लामिछानेले लेखेका छन्। पछिल्लो समय प्रधानमन्त्री शाह र रास्वपाका नेताहरूबीच सामाजिक सञ्जाल र सार्वजनिक मञ्चमा वैचारिक द्वन्द्व बढिरहेका बेला लामिछानेको यो टिप्पणी सार्वजनिक भएको हो।