काठमाडौं- भारतको सेवा क्षेत्रको वृद्धिदर अप्रिल महिनामा बढेको छ । मार्च महिनामा यो क्षेत्र १४ महिनाकै न्यून विन्दुमा पुगेको थियो । विश्वव्यापी माग कमजोर भए पनि आन्तरिक माग बलियो हुँदा यस क्षेत्रमा सुधार आएको हो । यद्यपि, मध्यपूर्वमा जारी द्वन्द्वका कारण देखिएको अनिश्चितताले आगामी वर्षको उत्साहमा भने केही कमी आएको हालै सार्वजनिक प्रतिवेदनमा उल्लेख छ ।

एस एन्ड पी ग्लोबलले तयार पारेको ‘एचएसबीसी इन्डिया सर्भिसेज पर्चेजिङ म्यानेजर्स इन्डेक्स’ (पीएमआई) अप्रिलमा ५८.८ पुगेको छ । यो सूचक मार्च महिनामा ५७.५ थियो । यो प्रारम्भिक अनुमानभन्दा बढी हो । सन् २०२१ को मध्यदेखि यो सूचक ५० अङ्कभन्दा माथि रहँदै आएको छ । यसले सेवा क्षेत्रमा लगातार विस्तार भइरहेको सङ्केत गर्छ ।

नयाँ व्यवसायको वृद्धिदर अप्रिल महिनामा पाँच महिनायताकै तीव्र गतिमा बढेको छ । यसले बजारमा बलियो माग रहेको देखाउँछ । उपभोक्ता सेवा क्षेत्रले नयाँ अर्डर र उत्पादनमा नेतृत्व गरेको छ। यसपछि यातायात, सूचना र सञ्चार क्षेत्र अग्रस्थानमा रहेका छन् ।

तर, अन्तर्राष्ट्रिय बिक्रीको वृद्धिदर भने एक वर्षभन्दा बढी समययताकै दोस्रो कमजोर अवस्थामा खुम्चिएको छ । कम्पनीहरूका अनुसार मध्यपूर्वको युद्ध र विदेशी पर्यटकको आगमनमा आएको सुस्ती यसको मुख्य कारण हो ।

अप्रिलमा कम्पनीहरूको सञ्चालन खर्च भने केही कम गतिमा बढेको छ । मार्चमा यो खर्च झन्डै चार वर्षकै उच्च विन्दुमा पुगेको थियो। खाद्यपदार्थ, ग्यास र श्रमको उच्च लागतका कारण अझै पनि खर्चिलो अवस्था नै छ। तर, कम्पनीहरूले यो अतिरिक्त भार आफैँले व्यहोरेका छन्। त्यसैले बिक्री मूल्यमा खासै ठूलो वृद्धि भएको छैन।