काठमाडौं– अर्थविद्हरूले सरकारले आगामी आर्थिक वर्षको लागि ल्याएको नीति तथा कार्यक्रममाथि मिश्रित हिसाबले प्रतिक्रिया जनाएका छन् ।

धेरै विषय पुरानै भएको, कम महत्वकाङ्क्षी भएको र बढी व्यववहारिक र केही क्षेत्रमा ठोस हुन खोजेको उनीहरूको भनाइ छ । पूर्वगभर्नर डा. चिरञ्जीवी नेपाल सरकारले ल्याएको नीति तथा कार्यक्रम आफूलाई राम्रो लागेको बताए ।

उनले नीति तथा कार्यक्रममा धेरै कार्यक्रम पुरानै रहेपनि केही कार्यक्रम ठोस गरेर ल्याइएको भन्दै कार्यान्वयनका लागि स्रोत व्यवस्थापनको चुनौती रहेको बताए ।

‘धेरै कार्यक्रम पुरानै पनि छन्, तर सरकारले सूचना प्रविधि, पर्यटन लगायतका क्षेत्रलाई ठोस गर्न खोजेको छ, यो नयाँपन हो’, उनले भने, ‘राम्रा कार्यक्रम समेटिएका छन् तर, तीनको कार्यान्वयनको लागि स्रोत व्यवस्थापन चुनौतीपूर्ण छ ।’

त्यस्तै, अर्थविद् डा. अनलराज भट्टराईले पनि सरकारले ल्याएको नीति तथा कार्यक्रम आफूलाई राम्रो लागेको बताए ।

खबरहबसँग कुरा गर्दै उनले सरकारले नीति तथा कार्यक्रममार्फत सुकुम्वासी समस्या समाधानदेखि निजी क्षेत्रलाई सम्बोधन गर्ने पहलसम्म गरेको भन्दै सबै विषय समेटिएको बताए ।

‘अलिकति ठोस परिणाम दिने हिसाबले पारदर्शीता ल्याउने, गैर आवासीय नेपालीलाई सहजीकरण गर्ने, सरकारले तोकेको भन्दा बढी लगानी ल्याउनेलाई भिसा दिने लगायत उत्पादन, उद्योग र विकासको विषयलाई सम्बोधन गर्ने कोसिस गरेको छ’, उनले भने, ‘यसले सबै क्षेत्रको मनोबल बढाउने हिसाबले प्रयास गरेको छ ।’

नीति तथा कार्यक्रमले पहिले जस्तो अति महत्वकांक्षा नराखेको र व्यवहारिक बढी देखिएको भन्दै अहिलेको सरकारले पहिलाको भन्दा बढी दायित्व महसुस गरेको जस्तो देखिएको उनले बताए ।

त्यस्तै, अर्का अर्थविद् गोविन्द नेपालले भने आफूले नीति तथा कार्यक्रमलाई धेरै स्मार्ट नदेखेको बताए ।

उनले कार्यक्रममा धेरै कार्यक्रम पुराना पनि रहेको भन्दै सार्वजनिक सेवाको विषय, करको व्यवस्थापन लगायतका केही विषयमा भने ठोस गर्न खोजिएको बताए ।

साथै उनले रास्वपाको बाचा आफूलाई निकै चुस्त लागेकोमा सो आधारमा अलिक विषय समेटिएनकी भन्ने आफूलाई लागेको बताए ।