काठमाडौं– सरकारले देशको ऊर्जा क्षेत्रमा ठूलो फड्को मार्ने लक्ष्यसहित ३० हजार मेगावाट विद्युत उत्पादन गर्ने योजना अघि सारेको छ। 

राष्ट्रपति रामचन्द्र पौडेलले संघीय संसद्को संयुक्त बैठकमा सरकारको आगामी आर्थिक वर्षको नीति तथा कार्यक्रम प्रस्तुत गर्दै उक्त लक्ष्य सार्वजनिक गरेका हुन्।

राष्ट्रपतिले जलविद्युत् उत्पादन वृद्धि गर्दै ऊर्जा क्षेत्रमा निजी तथा विदेशी लगानी आकर्षित गरिने बताए। साथै, जलविद्युत् आयोजना प्रभावित स्थानीय बासिन्दालाई सेयर उपलब्ध गराउने नीति पनि सरकारले लिएको जानकारी दिए।

सरकारले सबै नेपालीलाई विद्युतको पहुँचमा ल्याउने लक्ष्यसहित राष्ट्रिय प्रसारण प्रणाली विस्तार तथा ऊर्जा पूर्वाधार विकासलाई प्राथमिकतामा राखेको जनाएको छ।