काठमाडौं– राष्ट्रियसभाका अध्यक्ष नारायणप्रसाद दाहालले जनताको हित, समृद्धि र सुशासनको साझा लक्ष्य प्राप्तिका लागि राजनीतिक मतभेद तथा पूर्वाग्रहभन्दा माथि उठ्नुपर्नेमा जोड दिएका छन् ।

राष्ट्रियसभाको २१औँ अधिवेशनको शुभारम्भका अवसरमा आज सभालाई सम्बोधन गर्दै उनले दलीय स्वार्थभन्दा माथि उठेर राष्ट्रको आवश्यकता र राष्ट्रिय हितलाई प्राथमिकतामा राख्दै छलफलमा सहभागी हुन आग्रह गरे।

उनले भने, ‘यो २१औँ अधिवेशन बजेट अधिवेशनको रूपमा रहेको छ । यसमा सरकारको नीति तथा कार्यक्रम, विनियोजन विधेयक र बजेटमाथि गहन छलफल हुनेछ ।’ 

अध्यक्ष दाहालका अनुसार सङ्घीय निजामती सेवा, विद्यालय शिक्षा र नेपाल प्रहरीसम्बन्धी विधेयकलाई प्राथमिकताका साथ पारित गर्नुपर्ने जिम्मेवारी संसद्को काँधमा छ ।

विगतमा विधेयकको निरन्तरता कायम हुन नसक्दा केही महत्वपूर्ण विधेयक निष्क्रिय भएको उल्लेख गर्दै उनले तालिकाबद्ध बैठक सञ्चालन, समयमै विधेयक दर्ता, समितिको सक्रियता र सरकारको सहयोगले मात्र संसद्को कार्यक्षमता बढ्ने बताए।

यसै अवसरमा अध्यक्ष दाहालले यस अधिवेशनबाट संसद् बैठकको प्रत्यक्ष प्रसारणमा सांकेतिक भाषाको सुरुआत गरिएको जानकारी पनि दिए ।