तेहरान- इरानले अमेरिकी वायुसेनाको एउटा एफ-३५ लाइट्निङ आईआई लडाकु विमानले यूएईको एयर बेसमा आकस्मिक अवतरण गरेको दाबी गरेको छ।

भारतस्थित इरानी दूतावासले सामाजिक सञ्जाल एक्समार्फत् जानकारी दिँदै अमेरिकी एफ-३५ ए लाइटनिङ–आईआई विमान ओमान सागरमाथि उडानमा रहेका बेला ‘७७००’ इमरजेन्सी कोड प्रसारण गरेको जनाएको छ।

उड्डयन क्षेत्रमा ७७०० लाई सामान्य आपतकालीन संकेतका रूपमा लिइन्छ। दूतावासका अनुसार उक्त कोड प्रसारण गरेपछि विमानले आफ्नो मार्ग परिवर्तन गर्दै अल धफ्रा एयर बेसमा आकस्मिक अवतरण गरेको थियो।

पोस्टमा पछिल्लो २४ घण्टामा इमरजेन्सी कोड प्रसारण गर्ने यो दोस्रो अमेरिकी एफ-३५ ए लाइटनिङ–आईआई विमान भएको उल्लेख गरिएको छ ।

यद्यपि, यस घटनाबारे अमेरिका वा यूएईका तर्फबाट कुनै आधिकारिक प्रतिक्रिया सार्वजनिक भएको छैन।

अल धाफरा एयर बेस यूएईस्थित अमेरिकाको महत्त्वपूर्ण सैन्य अड्डामध्ये एक मानिन्छ, जहाँ अमेरिकी वायुसेनाका लडाकु विमान तथा निगरानी प्रणाली तैनाथ छन्।