काठमाडौं- राष्ट्रिय मानवअधिकार आयोगले जेन-जी आन्दोलनबारे तयार पारेको प्रतिवेदन सार्वजनिक गर्न मागसहित धर्नामा बसेका एकजना युवकलाई प्रहरीले पक्राउ गरेर लगेको छ।

जेन-जी अभियन्ता रविकिरण हमालका अनुसार ती युवकलाई प्रहरीले बलजफ्ती उठाएर लगेको हो ।

उनले जेन-जी आन्दोलनसँग सम्बन्धित आयोगको प्रतिवेदन महिनौँदेखि सार्वजनिक नगरिएको बताउँदै सत्य तथ्य बाहिर ल्याउनुपर्ने मागसहित धर्नामा बसेका युवालाई प्रहरीले गरेको पक्राउलाई ‘निन्दनीय, अमानवीय र फासीवादी कदम’ भनेका छन्।

हमालले प्रतिवेदन कसको दबाब र निर्देशनमा लुकाइएको हो भन्ने प्रश्न उठाउँदै पूर्वप्रधानमन्त्री केपी शर्मा ओली, तत्कालीन गृहमन्त्री रमेश लेखक तथा सुरक्षा प्रमुखलाई जोगाउन आयोग नै सत्ताको प्रभावमा परेको आरोप लगाए।

उनले आन्दोलनसँग सम्बन्धित घटनाको सत्य बाहिर ल्याउन माग गर्दै पक्राउ परेका सुनिल सिंह, अजय सोडारी लगायत सबैलाई तत्काल रिहा गर्न माग गरेका छन् ।

हमालले जेन-जी आन्दोलनको पूर्ण प्रतिवेदन सार्वजनिक गर्न तथा आयोगका पदाधिकारीले जनतासामु जवाफ दिनुपर्ने बताएका छन्। उनले ‘सत्य दबिन नसक्ने’ उल्लेख गर्दै दोषीमाथि कारबाही हुनुपर्ने र आन्दोलनका शहीदलाई न्याय दिनुपर्ने माग गरेका छन्।