काठमाडौं – अमेरिकी राष्ट्रपति डोनाल्ड ट्रम्पले विश्वका विभिन्न देशबाट तेल बोक्ने ट्यांकरहरू अमेरिकातर्फ आइरहेको दाबी गरेका छन् । इरानसँग जारी युद्धका कारण उत्पन्न प्रभावपछि अमेरिकामा पेट्रोलियम पदार्थको मूल्य उच्च रहेको अवस्थामा उनले यस्तो टिप्पणी गरेका हुन् ।

शनिबार सामाजिक सञ्जाल टुथ्र सोसलमा गरिएको पोस्टमा ट्रम्पले मुख्यधाराका सञ्चारमाध्यममाथि आलोचना गर्दै द्वन्द्वसम्बन्धी रिपोर्टिङप्रति असन्तुष्टि समेत जनाए । उनले अमेरिकी सेनाले हर्मुज जलडमरू मार्ग क्षेत्रमा “सफा गर्ने” प्रक्रिया सुरु गरिरहेको पनि उल्लेख गरे ।

ट्रम्पका अनुसार यो कार्य चीन, जापान, दक्षिण कोरिया, फ्रान्स, जर्मनीलगायत विश्वका अन्य देशहरूको हितका लागि गरिएको सहयोग हो । उनले ती देशहरूसँग आफैं यस्तो काम गर्ने साहस वा इच्छाशक्ति नभएको दाबी पनि गरे ।

उनले थपे, ‘अचम्मको कुरा के छ भने, विभिन्न देशका खाली तेल ट्यांकरहरू अहिले अमेरिकातर्फ आइरहेका छन्, जहाँ उनीहरू तेल भर्न चाहन्छन्।’

यता, एक महिनाभन्दा बढी समयदेखि जारी द्वन्द्वपछि दीर्घकालीन युद्धविरामको प्रयासस्वरूप अमेरिका र इरानका प्रतिनिधिमण्डलहरू पाकिस्तानमा भेटेर वार्ता सुरु गरेका छन्।